(المجد راس وفعلك اليوم هامـه
حقايق ماهي دعايـات واوهـام)
وللعز نور وبـرق غيـم اليمامـه
يكشف خفا بيض الضماير للاقلام
لين انبلج ضيقن بصدري جهامـه
ليلن عتيم اتموج ابه سود الاجرام
ثم امتطى المعروف واطلق خطامه
للازم اللي صار زامـه وراء زام
واثنيت مردوم الفكر مـن سنامـه
عل وعسى يكرم كريمين الاشمام
وعصبت راس المعضله بالعمامه
لين انكسر من لوفها كل مـرزام
ليت الشعر لو اكتمل حول عامـه
لاجل يتجمل مع خواله والاعمـام
وان كبرت القاله بصوت الدمامـه
وبدا يتيه الصوت مع فح الانسـام
ياقف لها شيخ العرب بالصرامـه
ولاحركت من هيبته راس الابهام
ملك علا راسه على كـل قامـه
بين الشعوب وروسها عند الاقوام
لولا الاسد ماعاش فرخ الحمامـه
ولاالظبي عاش بحمى كل ضرغام