السلام عليكم ورحمة الله

ابيات اتمنى ان تشفع للغياب






[poem=font="Simplified Arabic,5,red,bold,normal" bkcolor="transparent" bkimage="" border="ridge,4,orangered" type=1 line=0 align=center use=ex num="0,black""]
على درب الغرام اللي تمرّه = اذا حدّك من الأشواق حادي
ثلاث سنين مالك فيه جرّة = ولا هبّت بك أنسام البرادي
على ذكراك عال الصوت أجرّه = ومع طيفك اهيم بـ كل وادي
من الأشواق قلبي زاد حرّه = تفحم واحترق وأصبح رمادي
وروحي تشتكي منك المضرة = اجاهدها على بُعدك جهادي
غيابك ماترك لي من مسرّة = وهجرانك وصل حدّ التمادي
ترى المسلم حرام إنك تضرّه = إذا ماتنفعه خلك حيادي
بعد عشنا الغلا حلوه ومرّه = نهايتها التجافي والعنادي
قضينا والزمن لله درّه = يعلمنا الصدوق من الربادي
وشيٍ راح لايمكن نكرّه = عساها خير من رب العبادي
ماباقي لك ولو مثقال ذرّة = تلاشى كل حبك من فؤادي
مافيها لاعتاب ولا تشرّه = حضورك أو غيابك صار عادي
نصحتك قبلها عشرين مرّة = ( ولكن لا حياة لمن تنادي)
قنعت من الهوا خيره وشرّه = وريّحت المطيّة والشدادي
لكن درب الغرام احذر تمرّه = ولو حدّك من الأشواق حادي
[/poem]