يا مسافة طريق المتعبين الصعب
احتفي دام حلمي مقتفيه الغبار
جيت والريح تعصف في بقايا اللهب
انثر اخر حروف ٍ يحتضنها الشرار
هات سمعك حبيبي وانت صدرك رحب
يكفي ليا رحلنا ما رحلنا صغار
كل بحر ٍ طرقته في وصالك نضب
وكل ماابديت خطوة تاه فيها المدار
وكل ماجيت ادوّر عن فراقك سبب
لوّحت لي يمينك في زفاف انكسار
وانت دمعة تهاوت في شليل الهدب
ماذرفها ضميري والدموع احتضار
جيت اخبيك لكن طال كف المهب
واستحالت على اللي محتضنها وقار
نايف ٍ طول عمري مانكسرت لتعب
ولو تداعت خصومي ماعرفت الفرار
بس جيت اعترف لك صار سيفي خشب
واجمل احلام عمري آيل ٍ للدمار
سولفي للسحايب وارتطام الشهب
عن بسالة مشاعر في زمان انهيار
وخبّري كل عاشق ذاب في من يحب
كيف الاحلام طاحت في مسافة نهار
واذكريني ملامح من سكون وصخب
وادمحي كل مابي من بياض وسمار
/
تجاعيد الجفا لاحت على وجه الليال السمر
وبدت ريح الفراق تهز غصن اوراق تشريني
نحل عود الامل واقفت مسافات المزون الغر
وتمادى الجدب وانسابت جذوره في شراييني
وانا ضلع المخيل اللي وسم خد القفار البكر
تعالي والمحي وحشة غيابك في بساتيني
وحيد وتايه الخطوة على ذمة سراب الهجر
اسايرها ولا ادري وين هالرحلة توديني
الا يا غايرة خلف السراب ومحتضنك البحر
انا ماعادني ذاك العنيد اللي عرفتيني
على ارصفة الامل واقف بقايا من رماد وجمر
تهب الريح وتغيّر مع المسرى عناويني
واطارد طيفك العابر على مد ارتحال الفكر
على صحرا من الذكرى ورا الحرمان تنفيني
واداعب باقي احلا م ٍ تعريها خيوط الفجر
عسى في غمرة احساس الحنين المر تطريني
وتزوريني ولو نسمة بها كف الغيوم ا/تمر
وتمر طيوف هالذكرى وتحوفك من هدب عيني
والمّ فصول ذكرانا واكفنها رذاذ وعطر
واروح اذرع مسافات الهروب .. والمحك فيني
ويناديني صدى صوت ٍ تقطع في جليد العمر
واسافر للصدى والتيه في صحراه يطويني
تعب هذا الحنين اللي نثرني في رياح الغدر
وشتات احلام مكسورة على رملة دواويني
ترى ماجيت ابيّن لك ذنوب ٍ يحتديها العذر
ولاني سائل ٍ قلبك على ايّة ذنب يرميني
انا جيتك من اطراف الرحيل وفي ضلوعي زجر
ابي قبل ارتحل عنّك .. الى الذكرى .. تضميني!
غريب .. وداخلي رجفة حنين .. ودمعتين ٍ خضر
وبقايا من حطب ذكرى تشب ولا تدفيني .!
فلاح فارس الجربا