قصيدة افتتاحية في ملتقى عمان الشعري الثالث
[poem=font="Simplified Arabic,5,darkblue,bold,normal" bkcolor="transparent" bkimage="" border="none,5,gray" type=2 line=0 align=center use=ex num="0,black""]
قال : امسيه ، قلت : الشعر مامرّ صدري من زمان = بيني وبينه شرهه وضيقة خواطر من سنه
ماله مزاج يلحن همومي بلحن الزعفران = وانا بعد مالي مزاج ادوزنه وادندنه
قال : السبب ! قلت : السبب مابين صار وبين كان = طال الجفا ، والصمت طاول موطني واستوطنه
مقطوع خيط السبحه ومنثور حب الكهرمان = وشعوري اتراكم وهو غايب ولايدري عنه
ان كان حي يهز بانفاسه غصون القحويان = وان كان مات الله يجازي من طعني وطعنه
شاعر ولااتصنع لساني قلب ولقلبي لسان = وحسب اعتقادي فالحياه ان اصدق الشعر احسنه
قال : امتطي ظهر الجواد اللي كسبت ابه الرهان = اللي قفزت ابه الف حاجز للقلوب المنتنه
هاك السنه يوم الشعر غنى لراع الصولجان = وانته جوادك من يدك سرجه وفي يدك رسنه
قلت : الصراحه مابقى للشعر طعم وعنفوان = استرخصوه وصار يجري فوق كل الالسنه
من ضاع مستقبل حياته قال اسوي لي كيان = واصير شاعر واكتب احلامي وتصبح ممكنه
حتى غصون الذايقه يبست ولا فيها ليان = غرّد بها العصفور الازرق لين صارت موطنه
قال : امسيه ، قلت : الأماسي ماهي بدايم أمان = الا اذا زادت على محراب شعري مئذنه
قال : امسيه ، قلت : اعطني الموعد وحدد لي المكان = قال : الوعد فالثامنه شعراً على ارض السلطنه
قلت : الله اكبر ياشعر والسلطنه يعني عمان = في سلطنة عمان يعني ياالشعر لك سلطنه
لاوالله الا يافهد جيتك على ظهر الحصان = انا وسيفي وقلمي والغايب اللي له سنه
[/poem]
|