|
اللون الرمادي
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
سولفي للريح .. ياجمرة رمادي = عن لهيب البرد ، واحساس القطاعه
حيّ واتنفس .. على حسب اعتقادي = وكان موتي .. بين صدق وبين اشاعه
آدمي ، واهيم شعر بكل وادي = وشاعر ، ويقرا بن آدم في صراعه
كل مااتمرّد .. قناعاتي تنادي = واقنع .. لصوت الضمير ولاستماعه
ان رضيت .. ارضى بشكلٍ لاإرادي = وان زعلت .. ازعل ولاعندي مناعه
والرجل ، ياابيض ياأسود .. فاالمبادي = كنت فارضها على ذاتي .. قناعه
لين طيّحني على وجهي .. جوادي = وانجرح .. معلوقي وكسرت ذراعه
من يعلمني ! على اللون الرمادي = راح مني .. نص عمر ونص ساعه
ودي اعيش الحياه .. بجو هادي = مع حبايب ، واصدقا وقت ، وجماعه
مابقى لي في مداي .. الا مدادي = بحر شاعر ، قاربه عنّى شراعه
الزمن ، يعزفني بريشة عبادي = والوطن ، يمسحني بريشة يراعه
والتعب ، شرّد شعوري في بلادي = والحزن ، ورّط بلادي في مجاعه
ليه مااصبح مثل بعض الناس .. عادي = وان برد وجهي .. تلحّفت بقناعه
واتمايل ضحك .. لوجيه الاعادي = واتثعلب .. في دهاليز الطماعه
وان ضحك .. وجه الزمان الاقتصادي = قلت : جود السوق ولاجود البضاعه
مانفعني صدقي ، ولا اثمر عنادي = غير شخصٍ ضايع .. يبرّر ضياعه
هذا انا .. وبنفس مودي فوق مادي = بارع ، وخالي من احساس البراعه
سولفتني .. ريحي لجمرة رمادي = من لهيب البرد ، واحساس القطاعه
[/poem]
|