جتني تقول الهوى غابة تضج وحوش وذياب
والمعطف اللي تباهى به من جلود الذيابة!

خطوة قدمها لحن سابع وتر في عود زرياب
وانا لحن خطوة اقدامي مثل لحن الربابة!

ما تدري ان العيون الناعسات رماح وحراب
حنا ضحايا ورمش عيونها حطاب غابة!

وثايبها اللي من اول خيطها حنطة وعناب
كيف انكرتني وحنا فاول خطوط التشابه!

يا ليت سلمى بقت سلمى ووجه الريف ما غاب
وياليت ليل المدينة قبل نوصل صك بابه

فالصدر بيت عموده خافقي وظلوعي اطناب
واللي سكن فيه نصف العمر راح ولا درى به

ترك لي النار والكانون فيه وحرق الاعصاب
اودع افراح مرت فيه واستقبل كابه!

بشويش ابا ارحل تراب الارض تحتي ماهو تراب
قلوب عشاق ماتوا قبلنا حب وصبابة!

يمكن على قلب نوت تدوس رجلي واجرح عقاب
والا على قبر ابو زيد ويعاتبني ترابه!