بالله ياكبتن الى من تساويت
بين السماا والارض فوق السحابه
* * * * *
على الجناح ارجوك بـ اجْلس وياليت
ان كان معنا احْدٍ يجر الربابه
* * * * *
خلّه معي يطلع ترى كم تمنيت
صارت ولاصارت ولامن غرابه
* * * * *
في خاطري يالكبتن الذرب كم بيت
اجتاحها عالي سماي وضبابه
* * * * *
لاجرها راعي الربابه وجريت
صوتي معه،ماجابت الورق جابه
* * * * *
لاجر قوسه مع صدى الصوت لاحيت
لاحيت له لو مقصدي مادرى به
* * * * *
وان هيّض المشتاق مابحت وابديت
يبيحني لامن هجوسه غدابه
* * * * *
على الجناح ارتاح لو ماتقهويت
كافي مطر قافي سحابه سرى به
* * * * *
لاسابقك شق الفضاا،وان تعليت
مدد لنا فالوقت واحسب حْسابه
* * * * *
تكسب اجر لامن تجملت واعطيت
ساعات فـ الرحله،تزيل الكآبه