|
يارب
يافارج الكربات عفوك ياكريم
أنت الإه ولا لنا غيرك إلاه
يارب تهدينا الصراط المستقيم
وإنك توجهنا لخير الإتجاه
أنت العظيم أنت الكريم أنت الحليم
ولا لنا عن فضلك وجودك غناه
قامت تضايقني ذعاذيع النسيم
ماعاد للدنيا وما فيها طراه
في خير لاني لا فقير ولا سقيم
واسمي مع العالم ينشميني صداه
اضحك واجامل مير كني مستضيم
ياوسع صدري لكن ادنى ما ملاه
احن للماضي وللعهد القديم
كني ليا هلحينه استنشق شذاه
أول حياتي من نعيما في نعيم
بين الثنين اللي تواجدهم حياة
كانو يقولو اليتيم اخو الفطيم
فاقد حنانه مثل من يفقد غذاه
واليوم انا من بعد ما راحو (يتيم)
فقير راحة نفس وانا فئ غناة
وتداول الايام والله العظيم
انه عبر وانه يثير الانتباه
العام كنه يوم والهايم يهيم
ساعات تربط مبتداه بمنتهاه
واللي يقول العمر رقم أصلا غشيم
لا والله الا ارقام تطحنها الرحاه
الفايته طويت مثل طي البريم
والمقبله منها توردك الوفاه
مدري نعيم تقابله والا جحيم
اهم شي اللي بقي حافظ علاه
كذا كذا ماحدٍ على الدنيا مقيم
لك منزل ماعاد تدوري وش وراه
تبي تحصل في مضيفه سين جيم
حضر لها مضبوط وابشر يالنجاه
اما تجاوب صح واسلم يا سليم
والا من الفجعه تجاوب هاه هاه
ميدان مخلاص الغريم من الغربم
كلن على حسب العمل يلقى جزاه
تم القصيد اللي يوقع في الصميم
ذكر بها اللي يا عسى الدنيا فداه
اللي يدور شعر يبشر بالنديم
واللي يدور نقد يقضم له حصاه
عبدالله القثامي
-------------------------------
|