مساء الخيرات والمسرات يااهل المرقاب....

مدح الرجال الطيبين فخر لكل شاعر...

الكرم قبيلة شمر مشهورين فيه.....وعتيبه شهرتهم بالشجاعه والأقدام

ومن الجميل ان يذكر الشاعر محاسن القبيله الممدوحه....


وحبيت اهديكم هذه القصيده....وصدقوني احس بنقص بالأبيات

لم تأتي حسب مااريد بقوتها...وجزالتها

ارجوا ان تحوز على جزء من ذائقتكم الشعريه...




يقول من هو حضر والشعر يشتاقه
يفل جزل البيوت الغير مسبوقه

من راس شاعر يرد الطاق بالطاقه
نورٍ بيوته ولو قد هضمت حقوقه

ابيات تاتي لقوم الخير سباقه
لهل الوفا والمراجل مابهم عوقه

من طب ضيفٍ على ناصر مع ارفاقه
عطاه عمره مع الجزلات من نوقه

انفوسهم للشجاعه دوم سباقه
يوم المسير يجي والنفس مطروقه

شرٍ سكن بالجزيره للعدو عاقه
قومٍ لهم للمنايا روح محروقه

شفت العتيبي يسوق الطيب واستاقه
شرواة ذيبٍ يدور الطيب ويسوقه

مابين ساجر وشقرا ليت ياشفاقه
جعل الحيا بنتثر من ماه وبروقه

يسقى وطن للقروم بنجد واعماقه
وريح النفل نستشم الطيب بعروقه

جتكم بيوتي ويوم الشعر نشتاقه
افل جزل البيوت الغير مسبوقه

يالله تاقي رجال الطيب ياشفاقه
من حر ذاك الزمان الشين وحروقه


وسلامتكم

احمد مبارك الخالدي