مساء الخير للجميع: عزالله اني اقدم اعتذاري عن الانقطاع وانا خجلان لكن من طيبكم تجريّت وقدمته
وأنا يعلم الله اني مانيب في الخليج بكبره ماهوب الكويت وبس وانشدوا ناصر بن راشد وسداح الثنين ابخص

وهاذي القصيده اعتبروها عربون رجعه للمنتدى عقب ربطة الطيور
[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ياسعيد ابن خلفان قم شغّل الجيب = شفني من البارح على راس كوعي
يتلني الهاجوس تل الكلاليب = ولو التتن ماكان هديت روعي
تتن اليمن تثني عليه الشواريب = وأنا ثنيته في مفالج ضلوعي
لولاه من يحرز خضار الهناديب = اللي تحت كفّي وبامري وطوعي
ياما قطعت من الغياهب غياهيب = سود الليال متيّهات الجموعي
والبارحه ياراعي الفطّر الشيب = ذودك تذكرني معزّة ربوعي
أهل البكار السود حرش العراقيب = قبل احتلال الترك دار الشيوعي
وأنا على طاري اللحا وألاشانيب = قرّبت فنجالي وتمرة قدوعي
وأقول يامعزّب وكيل المعازيب = أبعد عليك من الثريّا خضوعي
ياشيخ لاترسل علي المناديب = مادام طبعك مايناسب طبوعي
الله عطاني نفس طير وعظم ذيب = واليا لحقني جوع سدّيت جوعي
عيشة حرار الصيد عكف المخاليب = ماهيب عيشة مشعلين الشموعي
جيتك عزيز النفس ياشيخ مانيب = رجلٍ على خزنة رصيدك دنوعي
واقفايتي منّك ترى مابها عيب = العيب والله عقب مااقفي رجوعي
مبارك بن اعيينان[/poem]