للشاعر/ جـابـر بـن هـايـف
هذه المشاركة الثانية لـ متابعة المرقاب/ ريـم عـتـيـبـه
شاكرين لها تفاعلها مع الموضوع ومشاركتها
وفي إنتظار بقية الأعضاء والمتابعين
وما تجود به ذوائقهم!
ذبحني هالسؤال ارجوك قلي بـس وشجابـه
دخيلـك ليـه تتعمـد مـع ضحكـك تبكينـي
من البارح تعيده هالسـؤال وتطـرق ابوابـه
وعلى نفس الطريق اللي تجـي منـه تودينـي
قلي وش تبي مني وحزني ويـش تلقـى بـه
يهمك ايش في هـذا عذابـي وانخلـق فينـي
تبي تعرف حكاية شاعـر جمهـوره احبابـه
تبي تعرف يصفق ليـه جمهـوري ويحيينـي
لأن الشعر عندي ماهو بـس اوراق وكتابـه
ولاني من فراغ اكتب .. ابي تكثـر دواوينـي
تبي تعرفني. شاعر ليه ؟ هاك الشعر واسبابه
تبي تعـرف مكانـي ويـن رتبهـا وتلاقينـي
فقر مال وفقـر حـال وفقـر حيلـه وطلابـه
فقـر حـظ كريـم امدلـه كفـي ويعطيـنـي
فقر عيشه فقر دنيـا وجـوع تنهـش انيابـه
فقر راحه فقر صحـه فقـر فرحـه تنسينـي
فقر ايه الفقر يعنـي ضيـاع العمـر وركابـه
فقر يعني فقر يعنـي عـذاب وضيـم مالينـي
وراس الفقر وراس الجوع وعمر طارت اسرابه
وحق الدرهم اللـي مانـوى مـره يخاوينـي
رضعت الويل من صغري ولبست الحزن وثيابه
على شط الشقا مولود .. همي كـان يسقينـي
تقطع وجهي وجلدي بنـاب الفقـر ومخلابـه
ولا كني عزيـز النفـس ولا احتـاج تغنينـي
كساني ثوبي المشقوق وبين النـاس ازهابـه
وكـل يلتفـت يمـي يضـن بتنكسـر عينـي
حشى ماتنكسر عيني وانا اللي وقتـه يهابـه
عزاي اني فقيـر صـارت النظـرات ترمينـي
عيون الناس تطعنـي وكـل يغـرس احرابـه
وبعض عيون اقدرها وبعض عيـون تدمينـي
وش اللي مابعد قلته وتبغى تعـرف اعرابـه؟
مضيت ساعات اتكلـم وانـت بـس توحينـي
تبي تعرف حكاية عشق وبنـت حيـل لعابـه
تبي تعرف عن اسباب الجفى ما بينها وبينـي
تخيـل جتنـي وقالـت فمـان الله ورحـابـه
تشرفـنـا بمعـرفـتـك ويالله لا تـأذيـنـي
وانا اعشقها ثمان اسنين وهي تلعـب وكذابـه
تسلـي نفسهـا فينـي ونيتـهـا تخليـنـي
تبي تعرف حكاية قبر وطفلـه تسكـن اترابـه
تبـي اقولهـا مظلـوم ودم الطفلـه بيدينـي
تبي تعرف وش الغربه من اللي طول اغيابـه
تبي احكي قبل اعـوام بالتفصيـل انـا وينـي
تبي احكي عن الزاهد وعن ذنبه في محرابـه
دخيلك مقدر اتكلم خـلاص ارجـوك تعفينـي
قسم بالله في صدري مدينـه تلتحـف غابـه
مدينـه ساكنـه قلبـي وغابتهـا شراييـنـي
دخيلك سكر الموضوع وشف لك شي اتسلى به
انـا منـك ألاقيهـا او ألقاهـا مـن سنينـي
|