ميثاء

لشاعره نيافه

((( الـعــود الـمـعتــق )))


بعض البشر كبيـر جـداً .. لان ماحولـه كبيـر
مثل القصير اللـي مـع الاقـزام طالـت هامتـه

قس الكبير مع الكبار وقس صغيـرٍ مـع صغيـر
لاغرّك اللي فـي سـرا الاطفـال يسمـك قامتـه

يعني اذا صارت حرير وصوف .. نختـار الحريـر
لكن حريرٍ مع حريـر .. الفـرق جـودة خامتـه

ياسيدي كان اختيـارك سهـل مـن بيـن الكثيـر
قبل الهوى في القلـب ياعمـري تقـوم قيامتـه

كنت متميز عن مناعير الرجال . . وكنـت غيـر
واختـارك القلـب وفـرد . . لعيونـك إبتسامتـه

هذا ورغم ان الهوى عفوي .. وتحديـد المصيـر
من إختصاصات القدر . . وانـا احتـرم صرامتـه

لكن انا روحـي .. تجاذبهـا القناعـات وتسيـر
وتقـدم لمحرابهـا . . مـن يستحـق إمامـتـه

دلو العواطف تجذبه يد الهوى . . مـن جـم بيـر
ويرقا قراح الحب . . بحبـال القلـوب الصامتـه

تستقبلـه افـواه عشـاق ٌ مجففـهـا الهجـيـر
ليـن الضمـا رام الحناجـر والحناجـر رامـتـه

كاسـه يعـدا للقلـوب إللـي تشـوم وتستخيـر
ماهـي قلـوبٍ لالقـت كـاس الحثالـه هامتـه

ياسيدي عديت لي كاسك .. وجا في الامـر خيـر
معك افطرت نفـسٍ نهـار العمـر كلـه صامتـه

انعشتنـي يانفحـة العـود المعتـق . . ياسفيـر
جلالـة الحـب الاصيـل . . ومنتهـى فخامـتـه

ما اخترتك إلا لن مالـك فـي تواصيفـك خشيـر
والعين قـرت بـك بليـل العاشقيـن . . ونامتـه

من وين جيت ؟ بلا انتظار . . وصرت شىٍ مايصير
يامرحبا باللـي لفـا . . وحمـداً علـى سلامتـه

افتح شبابيـك الغـلا . . خـل الستايـر تستذيـر
قدام يختلهـا الغبـار اللـي رسـم . . علامتـه

وافرد ضلوعي ياسحاب الوسم . . واقسم لي غدير
قلبي تحت هتانـك . . وعينـي علـى غمامتـه



وسلامتكم