منتديات المرقاب الأدبية - عرض مشاركة واحدة

26-03-2006, 01:22 PM

لاضيّق الوقت صدري بين ليـلٍ ويـوم
وزادت عليّ الهموم وبانـت أعراضهـا

وأمسىَ بقلبي لصلفات الطواري وسـوم
والعين سامـر نظرهـا بـارقٍ هاضهـا

وتاقت حيام الهجوس لصاملات العلـوم
اللي ورىَ الصدر مشتاهـا ومقياضهـا

ورّدتها ليـن تـروى والخفـوق مخـدوم
من جمّـةٍ يصـدُر الـروّاي ماغاضهـا

يأهل الهوى مابقالي فـي هواكـم لـزوم
خربَت قلوب العباد وكثـرث أمراضهـا

عُقب الوفا والصراحه والطرب والسلوم
شدّت طوال العلوم وحلّـت اعراضهـا

واليوم يأهل انفتـاح التقنيـه والرقـوم
ماباقـي الاّ رسـوم الحـب وأنقاضهـا

الحب مايتبـع الموضـه وطـرز الهـدوم
ويخلف مذاهب طيور العشق وألفاضهـا

والحب ماهوب رسمة قلب فيهـا سهـوم
مابيـن هاذيـك زعّلهـا وذي راضهـا

اليوم كل ٍ يصيد وكـل طيـر ٍ يحـوم
وكم صيدة ٍ شاع ماقعهـا ومنهاضهـا

لين اصبح الحب حربً مثل حرب النجوم
واللي ماتِرخِص شيمها تِهتَك أعراضهـا

والعز مأحد ٍ لبس ثوبـه بليّـا كمـوم
جعل المنايـا تقـود الـلاش لحياضهـا

تصحى القلوب الجَبانه في الحلوم وتنـوم
والليل يضحـك براضيهـا ومغتاضهـا

وتكتُب حكايات عشق ٍ من خيال الرخوم
وتجارب ٍ ماتبيّض وجـه مـن خاضهـا

لكنّ لـولا التغيّـر والفتـن والسمـوم
ماكان جفّت ريـاض القـاع وفياضهـا

واللي تغيّر ماهو بس الهوى والسلـوم!!
اليوم حتى الصداقه كثـرت أغراضها

عزالله العزيز انك غنيت واطربت يابن حبشان ,,

لله درك ثم لله درك
ابداع وتسلسل ومواضيع حساسه واتقان لايجيده الا الكبار ,
صح لسانك وسلمت يابطل