على الله وش نحبّ و ش نداني
نعـدّ أيامنـا والعمـر فانـي
.
تعبنـا نتبـع الدنيـا وشبـنـا
نشيل ظنون وأحـلام وأمانـي
.
يدور الليـل والصبـح يتنفـس
تحت حكم المعيـن المستعانـي
.
وأنا قلبـي يـدق وكـل دقـه
أركّبها علـى منطـق لسانـي
.
أغنّي والغنـا وهبـه مـن الله
ماجتني من فلان ومن فلانـي
.
ولا أدري موهبـه وإلاّ وراثـه
لكنّه قسم مـن ربـي وجانـي
.
بسيط ودايم افكـاري بسيطـه
في بدع البيت وتركيب المعاني
.
أروح إبها على شداد المطيـه
واعود إبها على سرج الحصاني
.
رصاصي من حـزام البندقيّـه
رميته وأصبح حزام الامانـي !
.
لو أن المدح من كل النواحـي
غمرني وأحتويتـه وأحتوانـي
.
وسط في مستواي ولي مقاسي
أقدّمها على مـا الله عطانـي
.
أطقّ البـاب وأدخـل ماعليّـه
لو أن البـاب للطاقـه حدانـي
.
اشيل الكحل لعيـون القصيـده
ولي غايه في تكحيل الغوانـي
.
ليا كحلّتها فـي ربـع ساعـه
نتفت رموشها فـاربع ثواني !
.
وكم غيري من عقولٍ بصيـره
تـرز أعـلام وتعمّـر مبانـي
.
لقيت الخير في كنـز القناعـه
وقنعت ولا جذبني كنـز ثانـي
.
أنا ويّـا العلاقـات الحميمـه
في حرب ٍ طاحنه سر وعيانـي
.
أضوّي لـي مصيبـه للحبيبـه
وأقـول الله بلاهـا وابتلانـي
.
ألا يا روح روحي لو جروحـي
تسولف لك عرفتي وش طواني
.
أغيب ولا نقص قـدر المحبّـه
ولا هنتي وحبـك مـا يهانـي
.
مزاجي وانطوائـي وانتهـازي
وقلبي قلـب مغـرور وأنانـي
.
هذا وصفي في عينك وانتي اللي
( خذاني الشوق لعيونك خذاني )
.
وطيفك كل ما يضـوي عليّـه
يجاذب روحي وينفـض كيانـي
.
يسيّر بـي علـى وده وشفّـه
تبعته من مكان إليـا مكانـي
.
في عيني يا بعد كـل الصبايـا
اشوفك باشة الغيـد الحسانـي
.
لكـن الله يحللـك ويبيـحـك
مع ودي وشكـري وإمتنانـي
.
سلمتي وإختصار آخر علومـي
تركت الحب كـان الله هدانـي
الدكتور سداح صح السانك طال عمرك وهذا الشعر اللي يطربله البال
لله درك وانا اخوك وعساك تبطي حي
وسلامي عليك وتحياتي واعجابي اللامحدود
اخوك / ذعار الديري
|