السلام عليكم ورحمة الله وبركاته
إلى زوّار المنتدى الشامخ
أقدّم إليكم هذي القصيده وهي موجه للشاعر حسين ضيف الله وسببها هو بيع ذوده قبل فتره قصيره...
...




[poem=font="Simplified Arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
من يوم ما بعت ذودك يابوضيف اللّه = وأنته على الرجم ترفع صوتك العالي
كنّك محبٍّ تباعد عن هوى خلّه =ولا عاد من بينهم خطٍّ ومرسالي
أنحابه الوقت والأيّام تحبلّه =ثم ذاق مرّ الفراق وجفوت الغالي
من أولٍ ترسل ويرسل وترسلّه =واليوم من بينهم مقطوع الأرسالي
ولاصار مالك (عقار) و(سهم) و(مجلّه) = وأصغر عيالك كبر ويعدّ رجّالي
وش لك على بيع دقّ الذود مع جلّه =لاصار ما أنت محدود بكثر الأعمالي
وإن كان في بيعته شيٍّ تهايلّه =أنا وربعي ومالي له مع حالي
أسوق له ماورايه جعله أفدلّه =ويرد عن جلبها للسوق طوّالي
وإن كانها جلّعت ماعاد يمهلّه = وأقفابها اللي شراها نقد بريالي
ماعاد غير الصبر والصبر ما مَلّه =رجلٍ معرّب مابين العم والخالي
أنت بدوي والبداوه طبع وجبلّه =من ماضي الوقت حتى وقتنا التالي
لابد لاشفت برّاقٍ كشف كلّه = برقه جنوبٍ ورعده له تزلزالي
بيجيك من عقب ما خايلته الغلّه =ويرد لك مامضى يا طيّب الفالي
وش لك بقصرٍ لو إن الطيب يدهلّه =لاشك طول المدا منه التملمالي
لا صار ما أمتد شوفك فالخلا خلّه = ولاعاد تعرف قمرها بدر وهلالي
وأنا هوايه مع البدوان وأدلّه =وممشاي في شفّ ذودي يشرح البالي
إليا جذبها وجات الوضح منتلّه =ما غبْط أنا الراجحي في كثر الأموالي
في مرتعٍ ماحدٍ داجه عقب عَـلّه= سبعة ليالي عليه الخير همّالي
عشبه معنّق وكبد الأرض مبتلّه = وريح الخزاما لطم فالمرتع الخالي
هذي حياتي وعمري لا قصر ظلّه =عساي مرحوم عند الخالق الوالي[/poem]وسلااااااااامتكم ...