منتديات المرقاب الأدبية - عرض مشاركة واحدة

30-05-2006, 04:31 AM

هلا وهلا وهلا وهلا مليووون

كل مـا فلّيـت صـدري يـا هبـوب الباحـه
وانكشف صدر السما لبروقـي .. ولرعـودي
بيـن جـوٍ رايـق .. ونفسـيّـةٍ مرتـاحـه
وبين تشتيت الهمـوم .. وحبلهـا الممـدودي
وسط روضٍ لا شـذى .. بـوروده الفواحـه
من شذى العنبر .. وريح المسك .. والكمبودي
اغتشانـي طـاري الذكـرى وزاد الحـاحـه
لين نسّانـي السلـوم اللـي بنتهـا جـدودي
الغـرام .. وشامتـه .. وعيونـه الذبـاحـه
والهنوف .. اللي خلقهـا الله تبيـح سـدودي
احتوتنـي بالغـرام .. ولبّستنـي وشـاحـه
وعلّقتني فـي رجـا فكـري وقـدح زنـودي
تعتبرنـي الشاعـر الاول .. ونجـم الساحـه
وتستهيم بكل بيـت .. وتقـرا حتـى ردودي
ولا شكرت مجاملتهـا .. قلـت يـا مزاحـه:
يرحـم الله مطلـق .. وعبـدالله المسعـودي
الوكـاد انهـا تـدكّ الفكـر .. ثـم تجتاحـه
وكل ليل اضم صورتهـا .. واشـد عضـودي
وانصدمت .. وشرهة الشاعر علـى مسباحـه
لكـن الله لا يضيّـع جـهـدي ومجـهـودي
صارحتني .. تحت بنـد ان الصراحـه راحـه
ساعـةٍ تشبـه ملامـح يومـي الموعـودي
صبحتنـي بالختـام .. وخاتـم التصبـاحـه
واحترق كرتي وانا فـي خدمـة الموجـودي
ما درت عن واقـع الفرقـا .. وقـو سلاحـه
لا قعد ينفض خفوقـي ليـن يكسـر عـودي
آآه .. ليت الله عطاني صـدر مثـل الواحـه
يستظـل بـه الزعـل .. لا ربّـع المنقـودي
كان مـا رِبّـط جنـاح الطيـر فـي ملواحـه
وكان ما طاحت لهـات الحاشـي المفـرودي
وليتها يوم اقفلـت بابـي .. خـذت مفتاحـه
يمكـن انهـا تفتحـه وتحـنّ لـي وتعـودي
مير سوقي الغيم عنـي يـا هبـوب الباحـه
دام ما ضحّك بروقي .. غير بكـيْ رعـودي!

الله الله الله الله

خالد اقسم بالله انها مطربتني لابعد حد ,

اذا هذي كيبورديه ياخوي لاتذخر شي من الكيبورديات

علي الحرام انها من اروع واجمل النصوص الغزليه اللي مرت علي يابو نجد ,,

الله يزيدك ولايضرك

تحياتي ومحبتي واعجابي المرمس