السلام عليكم ،


أبيات عساها تعجبكم ....



يادافع الشعر لا تنساق من دوني

_______________ مادمت في ذمتي سجّ القدم فيــّه




خلكّ على نيّتي .. وظنونك ظنوني

_______________ وأنا ما أغيرّ عليك الظنّ والنيّه




البارحه مرّت الأحـــلام بــ عيوني

_______________ أحلام سودا ماهيب أحلام ورديّه




تمرّدت وأستباحت حرمة جفوني

_______________ وراحت على دربها عجله وطرقيّه




أمسيت أصوّت لها وأصبحت مغبوني

_______________ وتفسيرها .. بين هاذيّه وهاذيـــّه




لو تستحي دمعتي من ضحكة سنوني

_______________ ماكان حطّت بنون العين ماريّه




اللي تناسيتهم .. واللي تناسوني

_______________ بالخير مذكوره .. وبالخير منسيّه




والحبّ لا هزّ صدري حرّك شجوني

_______________ وحطبت حدب الضلوع ونارها حيّه




أكثر جروحي سببها اللي يحبوّني

_______________ وجرح الحبايب عطيب وكيّته كيـّه




تبكي على راسي وتضحك على متوني

_______________ نفضت خرجي وطاح الداب والحيّه




وين أنت يا اللي عليك أكوسر لحوني

_______________ هيجنت بـ إسمك وشلت أغلى هجينيّه




يوم أنت هجسي وحدسي وأصدق فنوني

_______________ من لامني في غرامك لعنبو حيــّه




شطيّت بي في هواك وزادت شطوني

_______________ مع لاهب الشوق بين الشمس والفيّه




وعلمتني كيف أغيرّ شكلي ولوني

_______________ وأعيش جوّ .. الحكايات الغراميّه




يا سيّد الحب .. معك الحب ماموني

_______________ وأنا على جرّتك عيني شقاويّه




مجبور لا شفتني .. ماشي على هوني

_______________ حاولت وأزريت لا أكسر قيد رجليّه


وسلمتواا ،