حضورك ف المحافل خل ينقل لك حضور ابطـال
يشرّف وانت غايب وانت حاضر ف العرب موجود
تناقـل قولـك العالـم وتحفظهـا درر وامثـال
ولا ينقل عن اقوالـك هزيـل الهـرج والمنقـود
وجنّب عن سفيهيـن الدلايـل واتـرك الجهـال
وخل الديـن مقياسـك وهـذا غايـة المقصـود
إلى منّك كتبت الشعر وانساقـت بيـوت جـزال
تحيزم بالرصانه والحصافـه واسبـك المـردود
ترى بعض المعاني في بيوت الشعر شـم جبـال
تقاذف من قممها الشاهقه مثـل السيـول حيـود
وبعض الشعر مثل الكيف الاشقر عطّّـر الفنجـال
يقدّم للضيوف من المعـزب قبـل دهـن العـود
وبعض الشعر في دهم المواقف يشبـه الزلـزال
تزلزل به قصورٍ ما بهـا غيـر الحسـد معقـود
وبعض الشعر ما يشرونه العـراف لـو بريـال
بيوتـه مـا تجمّـل راس قايلهـا ودبـل كبـود
خسر من قال بيـتٍ مـا يجمّـل ينقـده عقـال
وجره من لسانه لين حطـه فـي فـم العبـرود
عيون الشعـر تتناقـل معانيهـا قـرون طـوال
ويبقى من يقول البيت الاسمى ف الملا محمـود
محمد المالكي
بيض الله وجهك
اشهد لله انك كفيت ووفيت بدون اي مجاملة
صح لسااانك وجااااد بياااانك
لله درك مدد بلا عدد
دمت بخير
,,,
|