,
عيني اللي من وصال أحبابها محرومـه
مالقت عقب الحبايـب واحـدٍ يرحمهـا
حزنها بـادي وفيهـا دمعـةٍ مكتومـه
دمعـةٍ لازاد همـي ليـنـي مولّمـهـا
ضاق بالي والسعاده داخلـي معدومـه
والتعاسه بيـنٍ فـي ناظـري مقدمهـا
منطوي والهم يأخذ فوق راسي حومـه
كنه الغيمـه وبـرّاق الوجـع قاسمهـا
صابر ومن جاه ماجاني تضيـع علومـه
والله انّ تمّـره الأنـسـام ماينسمـهـا
وحدي ومن كان وحده بيغدي بهمومـه
يبني صروح الهواجس جوفه ويهدمهـا
فاقدٍ بنت الكـرام الغضّـه المحشومـه
وخايفٍ لا الشوق يأخذني وأصيح أزهمها
خبري ابها مثل حلـمٍ قاطعتـه القومـه
ذكرياتٍ ودي أرجـع واغفـي وأحلمهـا
لابدت قلـت أقبلـي يالحلـوه النّعومـه
حي والله شوفتك ياجعلني مـا أعدمهـا
تنظر لعينـي بعيـنٍ كـن فيهـا نومـه
وتبتسم مدري تبسـم عينهـا أو فمهـا
عطفها في داخل فوادي تفيض غيومـه
أكرمتنـي بالحنـان ولاقـدرت أحرمهـا
من غرامٍ في ضلوعي جذوته مضرومـه
لاخبت نـاره شـوي يولعـه مبسمهـا
بعد ذا غابت وبعثـر فقدهـا المنظومـه
وقمت ببيوت القصيد أعيدهـا وأنظمهـا
الله عليك يابو سعيّد ..
نجم من نجوم الساحه ..
صح لسانك كثر حبات رمال النفود ..
تقبل الود والتقدير ..