خِيال الخَيال تسوقه رياح فكري ، صـوب
محيّر عقـول النـاس باسلوبـه وفنّـه
على صورته فالبال ، مزن القصيد نصوب
لبرّاقهـا نـوض ، ولرعّـادهـا حـنّـه
مطرها ، بيوتٍ لوحها بالذهـب مكتـوب
وفا معرفة مـن ذاب ظنّـي علـى ظنّـه
حسين الدلال اللي سلب مهجتي باسلـوب
سميّه ، غيابه في حساب البـدو كنّـه..؟
لحظني بعينٍ بان فـي رمشهـا ملعـوب
سروق النظر ، مشفوح الاعيان ماشنّـه
وهو عارفٍ سرق النظر، منه سرق قلوب
اداةٍ يصخرهـا علـى مثـلـي تقـنّـه
قفيته بونّه ، قال ونّه على المسحـوب!!
يبا يستثير ، وقلـت مـع تالـي الونّـه
انا والله المسحـوب يالجـادل الرعبـوب
ماهوب الغنـا بالقـاف واللعـب بالشنّـه
انا اللّي وقع باقصاه في فخّك المنصـوب
معاناه ، واشكيهـا علـى راعـي العنّـه
ضحك من جوابي ضحكة الواثق الموهوب
تحت لثمته ، لاح الكرستـال فـي سنّـه
وكشف لي نعيمٍ عن عيون الملا محجوب
انا أستغفر الله ( عيّنـة حـور) يمكنّـه
ولفحني نسيم شفاه واللولـو المصبـوب
بمنطوقه اللي من مـذاق العسـل كنّـه
وقال الكلام اللي عليـه القلـوب تـذوب
ماعمر انّي اوحيته من النـاس والجنّـه
هذا منك وانته مابعد صرت لي محبوب!!
اجل وش تسّوي لـو ادخّلـك فالجنّـه.؟
ادخّلك جنّـة لذّتـي لـو عليـك ذنـوب
واخلّيك تقطـف مـن ثمرهـا بـلا منّـه
اجبته ، وانا في موقف الحاير المغلـوب
وحالـي صواديـف المقاديـر يطـونّـه
ترا ماقسِم لي منك ، ياغايـة المطلـوب
ياكود انّ حبّك فرض ، ومشاهـدك سنّـه
بإختصار شديد جدا :-
هذا هو الشعر هذا هو الشعر هذا هو الشعر ..
ســـلطان ..
|