سلام يالمرقاب




[POEM="font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]كل ليلة تعدى والسهر كل ماله = يزرع الشوك في عيني وينبت لعينه
ضاق منه الرحيب وطول الليل باله = والهدب للهدب يروي حكاية حنينه
من شقى وقتي اللي كل ما اسج داله = هد ريح القلق واهتز غصن السكينه
راح فكري على البيت الكبيريحدى له = بيت شعري مدينه لا زهقت المدينه
فوق ماشال من زحمة همومي لحاله = ماتضايق ورد الباب بيني وبينه
جيته انسان يونس وحشته من ظلاله = الظما عن شماله والدهر عن يمينه
ان سكت عبّرت عينه على لسان حاله = وان حكى خاتمة صوته على مسمعينه
وان سعى للهوى من كتم الانفاس واله = وقف اكسيد كربونه وطاح اكسجينه
خاطره بير ضيقه لا دلي ومحاله = كل ما تارده فرحة تصدر حزينه
اقرب الناس "لا مر الفرح في خياله" = ابعد الناس "لا بيّح زمانه كنينه"
كل ما احتاج من ينشد عنه كيف حاله؟ = ما لقى غير حاله تنشده عنه وينه؟
مابقى له من الاحباب في من بقى له = غير من يرسم الضحكه بهمس اصبعينه
عاش عابر سبيل ومزهبه طيب فاله = كل همه رضاء ربه قبل والدينه
يمضي العمر وايامه تسابق لياله = والزمن قسوته تكسر مجاديف لينه
والرضاء بالقضاء ثوب الصحيح وعقاله = اشهد اني رضيت بشين وقتي وزينه
فقر الانسان ماهو قل حاله وماله = فقر الانسان قل اخلاقه وقل دينه
ايه زايمت كاس المر حتى الثماله = بس ما اقول سوّتها الظروف اللعينه
الفراق اوله علّه وتاليه عاله = خص لا مزع مهاد اللقاء قبل حينه
كبر هم العمى من فجعته في عياله = ثقل تنهيدة المديون من هم دينه
وين هاك الرفيق السمح قفت جماله؟ = قاع قلبي خلا ونفوس الايام شينه
اتشوّف وارد الشوف واعيش حاله = تشبه الحلم لكن المواري غبينه
والله انه مسوي فيّ خير وجماله = قبل لا اعتق عليه من العيون الرهينه
المشاعر تربت وافلحت من خلاله = والقصايد تشكّل ورد في راحتينه
كثر ما اغرقني جروح وتباعدت جاله = كثّر الله شوقي للبحر والسفينه
ومثل ما زانت محياه حبّات خاله = زينت قلبي طعونه وتسلم يدينه
اكذب ان قلت ساحرني حلاه وجماله = كل مافيه عادي من قدمه لجبينه
اللي يميزه ما فيه واحد بداله = روحي تعيش في روحه وتبقى سجينه
كل ما املك من احساس المحبه حلاله = من هنا لين تستاذن سنيني سنينه
مابقى غير ذكر الله جلَّ جلاله = يمنح القلب شيء من الهدوء والسكينه[/POEM]