منتديات المرقاب الأدبية - عرض مشاركة واحدة

30-04-2007, 10:50 PM

.
.

كل ليلـة تعـدى والسهـر كـل مالـه
يزرع الشوك في عيني وينبـت لعينـه
ضاق منه الرحيب وطول الليـل بالـه
والهدب للهدب يـروي حكايـة حنينـه
من شقى وقتي اللي كل ما اسـج دالـه
هد ريح القلق واهتز غصـن السكينـه
راح فكري على البيت الكبيريحدى لـه
بيت شعري مدينه لا زهقـت المدينـه
فوق ماشال من زحمة همومـي لحالـه
ماتضايـق ورد البـاب بينـي وبينـه
جيته انسان يونس وحشته من ظلالـه
الظما عن شماله والدهر عـن يمينـه
ان سكت عبّرت عينه على لسان حالـه
وان حكى خاتمة صوته على مسمعينـه
وان سعى للهوى من كتم الانفاس واله
وقف اكسيد كربونه وطـاح اكسجينـه
خاطره بيـر ضيقـه لا دلـي ومحالـه
كل ما تـارده فرحـة تصـدر حزينـه
اقرب الناس "لا مر الفرح فـي خيالـه"
ابعد النـاس "لا بيّـح زمانـه كنينـه"
كل ما احتاج من ينشد عنه كيف حاله؟
ما لقى غير حاله تنشده عنـه وينـه؟
مابقى له من الاحباب في من بقى لـه
غير من يرسم الضحكه بهمس اصبعينه
عاش عابر سبيل ومزهبه طيـب فالـه
كل همه رضـاء ربـه قبـل والدينـه
يمضي العمـر وايامـه تسابـق ليالـه
والزمن قسوته تكسر مجاديـف لينـه
والرضاء بالقضاء ثوب الصحيح وعقاله
اشهد اني رضيت بشين وقتي وزينـه
فقر الانسان ماهو قـل حالـه ومالـه
فقر الانسان قـل اخلاقـه وقـل دينـه
ايه زايمت كاس المـر حتـى الثمالـه
بس ما اقول سوّتها الظـروف اللعينـه
الفـراق اولـه علّـه وتاليـه عـالـه
خص لا مزع مهاد اللقاء قبـل حينـه
كبر هم العمى من فجعتـه فـي عيالـه
ثقل تنهيدة المديـون مـن هـم دينـه
وين هاك الرفيق السمح قفت جمالـه؟
قاع قلبي خلا ونفـوس الايـام شينـه
اتشوّف وارد الشوف واعيـش حالـه
تشبه الحلـم لكـن المـواري غبينـه
والله انه مسـوي فـيّ خيـر وجمالـه
قبل لا اعتق عليه من العيون الرهينـه
المشاعر تربت وافلحـت مـن خلالـه
والقصايـد تشكّـل ورد فـي راحتينـه
كثر ما اغرقني جروح وتباعدت جالـه
كثّـر الله شوقـي للبحـر والسفيـنـه
ومثل ما زانـت محيـاه حبّـات خالـه
زينت قلبـي طعونـه وتسلـم يدينـه
اكذب ان قلت ساحرني حـلاه وجمالـه
كل مافيه عـادي مـن قدمـه لجبينـه
اللي يميـزه مـا فيـه واحـد بدالـه
روحي تعيش في روحه وتبقى سجينـه
كل ما املك من احساس المحبه حلالـه
من هنا لين تستـاذن سنينـي سنينـه
مابقـى غيـر ذكـر الله جـلَّ جلالـه
يمنح القلب شيء من الهدوء والسكينه

الله الله

لله درّك يا كلاش .. !

جزلـه من فكر جـزل .. !

صح الله السااااااااااااااااااااااااااااانك ملاييييييييييييييييييييين .. !

و

سجلني

من ضمن المتابعييييييييييييييين .. !

.