|
بين النساء بالشكل تلقى بديـلـه
آخر الجديد آمل ان تنال رضاكم واستحسانكم
[POEM="font="Simplified Arabic,5,black,bold,normal" bkcolor="transparent" bkimage="./images/backgrounds/17.gif" border="none,4,gray" type=2 line=0 align=center use=ex num="0,black""]الشعر ولّع في خفوقي فتيله=باقصى معاليق الحشا تشعل اشعال
ماكل بيتٍ نسمعه نهتويله=بعض البيوت يمر ماكنه انقال
ان ماكسبت الشارده والجزيله=مالي مع اهل العرف مخرج ومدخال
الهرج واجد والفوايد قليله=وقت الصمايل تختلف بعض الاقوال
قولٍ بليا فعل وش ترتجي له=ضربٍ من التظليل وازعاج واجدال
احدٍ يحصل من كلامه فشيله=واحدٍ تشيله كلمته فوق ماطال
اللي يبي درب الخنا والرذيله=يطلق عنان النفس ويعاشر انذال
على طريق الغي يلقى زميله=والكل منهم لاسود الفعل يحتال
واللي يبا العليا يروم الطويله=يسعى لها ويثبت اقوال بفعال
يمشي على درب الشرف والفضيله=ماينحني لو فيه كف الدهر مال
يسعى لكسب الغانمه والجميله=ويحط له في ماكر العز منزال
اللي يبي قطف الزهر ينحني له=ماتكفي النيه لتحقيق الآمال
نيل المنى لابد له من وسيله =بالصبر والمجهود يتغير الحال
من غاص في غب البحور المهيله=لابد يصبر لين ياقف على الجال
لاصرت في غربه يبي لك دليله=بس البلا لاصار في مخك هبال
مايقنعك شرح العميل لعميله=يبلش بك اللي مقصده ينصح الضال
الحر في دربه يخاوي مثيله=والبوم ماله بالمراقيب مدهال
ممشى الهبيل بجنب ناسٍ هبيله=لو يعرفون الدرب مافيهم الدال
العاقل ان ماجاك حاول تجي له=احذر تماشي في مماشيك جهال
ترى الخوي لازم خويه يشيله=واحد من الاثنين لابد ينشال
النفس تهوى كل برقٍ تخيله=لاهملتها ترميك في وسط الاهوال
احذر تطاوعها بما تشتهي له=اضغط عليها لين ترضى بالاحوال
ترى القناعه للنفوس العليله =تحصين حتى عن مرض جمع الاموال
اد الصلاه الواجبه والنفيله=صم وتزك وحج ياطيب الفال
احرص على الارحام واللي تعيله=وامك وابوك اجزل لهم كل مكيال
والجار له حقٍ حرامٍ تزيله=وفه حقوقه واعذره كل ماعال
البخل رسمٍ بالوجيه البخيله=يبين لاجا صاحبه يدفع ريال
والبيض يكفي من هواهن حليله=تحفظك في غيبتك وتربي اجيال
بين النساء بالشكل تلقى بديله=فرقٍ بسيط وجوهر الشكل لازال
الفرق يظهر بالصفات النبيله=بالعقل والاخلاق ماهو بالازوال
احرص على بنت الرجال الاصيله=السالمه من هرجة القيل والقال
اسئل عن المنزال قبل تعني له=ماكل شجره ينوجد تحتها ظلال
ماكل وادي لو تسايل مسيله=تطلع بوادر بذرته عقب ماسال
وقت الرخا يطلع لك الفين حيله=تلقى الخوي والجار والعم والخال
ووقت الشدايد تنصدم بالحصيله=يطلع لك النصاب والنذل والذال
تلقى خويٍ شهم يسوى قبيله=والا الدويني منظره بس تمثال
الطيب ميزه والفعول تهدي له=ماكل من يلبس من الشمغ رجال
قافٍ دعاني مابغيت استويله=فجر بجوفي من عنى الوقت زلزال
حاولت ابين زبدته وتحليله=في نص ساعه سقته اقفاي واقبال
قلته وقلبي فوق صلو المليله=وارتاح بالي يوم روضت الامثال
وصلاة ربي عد وبل المخيله=على الصدوق الصادق بكل ماقال[/POEM]
الصديق اللي معه تحلى الصداقه=غير اطباعه بلا ذنب وخطيه
الله اكبر عقب هذيك العلاقه=عقب ماكنا سوى صبح وعشيه
دارت الايام واعثت فالرفاقه=لين كلٍ صار مايذكر خويه
ودي ارسله مع الاشواق باقه=خمس ورداتٍ حمر في مزهريه
لني اوده ولا ودي فراقه=قمت افتش في ملفات القضيه
|