مبطي وانا بينـي وبيـن الهواجيـس
وقفة تأمـل .. واستراحـة محـارب
عجزت لا افهم وش تقول الكوابيـس
في كل ليـل تمـرْ .. والهـا مـآرب
من حقي اوزن كل ما فات .. واقيس
واشمر ذراعي .. واسدد .. واقـارب
وكان البحر قدمي .. وخلفي تضاريس
وبموت من حيتـان .. والا عقـارب!
سلّمـت صـدري للهوا والنسانيـس
وسوّيت من نفسي لنفسـي تجـارب
شاعر معاناه .. وعذوبه .. واحاسيس
ومصامخٍ بيـن اللحـى والشـوارب
حتى ولو اعيـش خلـف الكواليـس
تعرفني الاجنـاب .. قبـل الأقـارب
ثبّتْ عرشي .. بين كسرى وبلقيـس
وانهار كسرى .. وانهدم سد مـارب
وان كان مال الميل .. دون النواميس
رفعـت كفّـي لله وقلـت ..يـا رب!
لحّفني .. بشِدّة هل الخيـل والعيـس
اللي لها يوم المضـارَب .. مضـارِب
وجنّبني من ابليس .. وعويّل ابليـس
ابليس حربه حرب .. وانـا مُحـارب
انسان تغريني المظاهر وانا .. ليـس
الاّ ! .. ضعيف ومنك واليك .. هارب
احلم .. ومن حلمي اشـب الفوانيـس
واصحى .. على وقع الفتن والمكارب
هذا زمان الدرس .. من غير تدريس
ياللي ليا هالحين .. تعمـل تجـارب
ان شفت بيضة ديك .. والا لبن تيـس
حاول تصدّق عينـك .. ولا تغـارب!
خالد والله انها اجمل قصيده قريتها من وقت
الله لايضرك
عشت لنا وللشعر والمرقاب
صح كلك
السلام والمحبه المفروغ منها
|