مبارك آل خليفه

لا اله الا الله

كلام سليم وتحدث الاحوال وتتغير في اشياء كثيره

بعض الرياجيل تطيّره سما لا قريت له شي تقول وش ذا الهامه ولا واجهته عيّنته فاشة لا تهش ولا تنش وبعض الرياجيل قول وفعل واحيانا كثيره يحاول الشخص قد ما يقتدر انه ما يمتدح نفسه من باب (( افعل ويكفونك الرجال المديح ))

وتواجهه وانت جاي لديرة يكون هو من اهلها وانت طرقي يعني يوم وماشي ولا انت بحاجته ولا لك فيه سنع وانت اصلا تبي تفتك من خلق الله لكن من ابسط حقوقك عليه بما انك ضيف كيف الحال .. والعزيمه ان كانه يبي يكسبك ويحط لنفسه صوره طيّبه وتروح وتجي كنك مواجه لك هندي غير ما يتعرضك .. عموما الامثال تضرب ولا تقاس وكل ٍ دون وجهه والطيّب اللي يسلم من الساحه واهلها لان العلاقه فيها فاشله ان كان علاقتك مع الرجال علاقة رجل مع رجل افلحت وعيّنت المراجل والعلوم الغانمه اما لا جات علاقة شاعر و شاعر فاتركه هو وعلاقته ..


انا شخصيا ً ما احب طرح امثله لكن بعض المواقف تجبرك في بعض المرات ان تضرب الامثله والطيّب ما يجحد طيبه ..

موقف حاب اني ادرجه حصل لي شخصيا ً من حوالي سنتين دعيت الى امسيه في الكويت وكلمني احد الشعراء قبلها وتأكد من التاريخ والتوقيت وفعلا في توقيت الرحله رحت للمطار لكن للاسف منعنا الضباب من الوصول في التوقيت المحدد مسبقا وكان هذا الشخص على اتصال مع توقيت وصول الرحله الى ان وصلت للكويت صباح اليوم التالي وتشرفت بمقابلته وباستضافته لي في مجلسه وكنت مع اصدقاء لي واكرمنا وحشمنا وقدرنا وحنا بدورنا كسبنا رجل انا شخصيا ً لم اعرفه مسبقا ولم يكن بيني وبينه اي اتصال مسبق قبل هذا وكسب له جماله ما راح انساها ما حييت ومن خلال موضوعك هذا احيي اخوي ابو محمد مرزوق العتيبي الله يبيّض وجهه ..

ومن باب آخر احد الصحفيين كسب محبة كثير من متابعي الساحه ومن شعرائها وصحفييها لان يتعامل معاملة رجل لرجل ماهوب معاملة شاعر وصحفي او صحفي وصحفي وحتى لو ابتعد الآن لكن ما زلت اقول ان نايف بندر كسب الجميع لانه رجل ويعامل الرجال معاملة رجال ,,



والرجال اللي فيهم الخير واجد ولو خليت لخربت لكن ضربت الامثله من شي في خاطري واهل الطيب يستاهلون


موضوع تستاهل عليه الشكر يا حسين

@mubarak_abdulla

Mubarak.alkhalifa@hotmail.com