[POEM="font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]يالبيب العقل فكّر ترى الدنيا متاع= لاتغرّك زبرقتهاوضحكة سنها
لوعطتك الوجه مرات تاليها خداع= تخلف الهقوات عاداتها يوم انها
يوم تفتح لك مشاريع وأبوابٍ وساع= ويوم تزعل من خلاها وتحرق بنها
تقتلب في كل مره نزول وإرتفاع= والجفا طبعٍ لها والتقلّب فنها
كم غنيٍّ كان فيها وتال الوقت جاع=وكم فقيرٍ صار يشعب بها ويعنها
انقلب حاله من الفقر وأيام الصراع= مع حياة الفقر وأيامه اللي كنها
لقمةٍ وسط النحر لاتروح ولاتزاع= وطابت ايامه وهو من قبل ماظنها
لاكن إنّاعارفين المغطّى بالشراع= صورةٍ تذهل هل العرف وأصحاب النها
النبي بيّن لناالخافيه يوم الوداع= بيّن اللي كان سود الليال تكنها
والمواعظ كل يومٍ لها فالناس داع= والقلوب الصاحيه للمواعظ هنها
والسعاده والمعزه لمن وحّد وطاع= واتّبع للسنه اللي نبيه سنها
وأدرك ان الوقت محسوب وأيامه سراع= تاخذ ارواح العباد انسها مع جنها
واجتهد فالدين وأدّاه قدر المستطاع= قبل غارات المنايا عليه تشنها
ثم يوضع في لحد موحشٍ في بطن قاع= ماتفيد اعماله اللي عملها ألاّ انها
خالصه لله من دون شرك ولانزاع= قارب للرب بعبادةٍ مامَنها
ومن دنا لله شبرٍ تقرّب له ذراع= فرصةٍ والعمر محدود ياصحاب النها[/POEM]