بسم الله الرحمن الرحيم
وصلي اللهم على رسول الله محمد وعلى آله
السلام عليكم وطابت اوقاتكم بالمسرات

قصيده مهداه الى سمو الامير جلوي بن عبدالعزيز بن مساعد نائب امير المنطقه الشرقيه


[POEM="font="Simplified Arabic,4,black,normal,normal" bkcolor="transparent" bkimage="" border="none,4,gray" type=2 line=1 align=center use=sp num="0,black""]متى أريّح خاطري شعْر وانساب=معَ شعوري وأستلذّ الكتابه
لا جات وانصبّت على البال الاسباب=والعذر قصّر كلّ ما له ومابه
المجْد ماهُو شعْر وطـْباعة كتاب= فعلٍ متى راعيه مات يحَيَا به
والطِيب يبقى سلسلة عرْق وانجاب= وجِينات طِيب الأبّ وابنه تشابه
وأكبر دليل وصدْق ما اطـْرَيت .. وانتاب=قولي .. وما ضمّ السؤال الإجابه
شف سيّد الوقفات وتعَرف الانساب= إنـْها تمدّ مْن الصلابه صلابه
هذا جلوي وانْ طاب ثمْ طاب ثمْ طاب=ما هي غريبه أو صنايع غرابه
هذا ولد من شرّع بسيفه الباب=للمجد لين المجد باسمه سمى به
عبدالعزيز ابن مساعد .. وَلا ارتاب=إنْ قلت موتٍ للعِدا يندعى به
في حِينها يوم انـّها رْماح وحْراب=وخيلٍ مراكضها فعُول الذيابه
قدْ قالها صقر الجزيره من اعجاب=ابن مساعد سيف عزّ ومهابه
من راعي الاجرب بنوكه لها اطناب=وليه ما يبزغ على العز نابه
ويبقى وريث المجد للمجد طلاّب=وتبقى النجابه من جذور النجابه
منها جلوي مجْنا وللمدح كسّاب=أي والله الاّ المدح يزهى جنابه
لا هنت يا اميرٍ على الطيب وثـّاب=وْلا هان صدرٍ للعظايم رحَابه
وْلا هنـْت يا مجرِّي على الحق من هاب=يا فاتح لمن يطلب العدل بابه
عَدْلٍ جنوح المَيل يحسب لك حساب=نعْم الرقيب ونعْم ذيك الرقابه
الله خلقـْك الـْها ومن أوْلي الالباب=والله هو الواهب جزيل المثابه
لا استفحَلت في وضْعها عُسْر الانشاب=أنته مهوّنها على كل جابه
سمّتـْك صعبات المهمات غلاّب=للجـِدّ جـِدّ وللبابه لبابه
فصّلت من خام المراجل لك ثياب=وبشـْت الوفا كاسيك قدْر وذرابه
من لاذ بك من قسوة الوقت ما خاب=فزعتـْك عن فزعة ثمانين لابه
ـــــــــــــ[/POEM]