السلام عليكم ،


تعبير فيه من التقصير الكثير اليكم مع الاعتذار




يا وسع صدري مير صدري لا ومره الله يضيق

............... حــّزم ضلوعه وأظهر اللي راكنه فـ أركونها




واللي ما يظهرها الزفير .. يتلّها تلّ الشهيق

............... لابدّ مع جرّ النسم ما ينكشف مكنونها




صابر وأنا بين الرجا والياس والجرح العميق

............... ما تنومن شهب الليال إليا تغيرّ لونها




يوم أحتمى الميقاف وجا للغيض فيض ونشف ريق

............... وقامت تجرّ المخطيه بين العباد لحونها




خليتني يا حادي ركابي على حيد الطريق

............... والمعرفه هانت وشانت واختلف قانونها




ناتج علاقتنا على ماقيل علمن ما يليق

............... بضاعة ٍ بادت قبل لا ينفتش كرتونها




منته بـ أخوي من الرضاع ولاني أخوك الشقيق

............... واللي تحطك سدّها بكره تجي من دونها !




غيـّبت من بعض العلوم الحامضه وأزريت أفيق

............... ما يذبح كبود الرجال ألاّ وساع طعونها




أختار فـ الثنتين .. وأنته لا عدوّ ولا صديق

............... والأولـّــه يا صعبها .. والثانيه ياهونها



وأعرف ترا ما اللهّ محمـّل عبده بما لايطيق

............... والناس حسب حظوظها ووفوقها وظنونها




شكرك على جنحانك إليا طرت يالحرّ الطليق

............... لو يمـّك فروخ النعام مبحلقات عيونها




أوّل علومي كنت أجرّ الصوت للغصن الوريق

............... وآخر علومي بشروّا ليلى عقل مجنونها ؟


وسلمتوا ،

>> هات و دوك ! <<