منتديات المرقاب الأدبية - عرض مشاركة واحدة

26-08-2007, 03:09 PM

انـا يارجـال المعرفـه ياؤلـي الالبـاب
مع اهل الشعر من عادني بزر إلى ذالحين
ألي ذايقه في الشعر تفتـح لـي الابـواب
اعرف القصيد الزين كله واعرف الشيـن
وذالحين قد عمري يتراوح وتـوي شـاب
من السته وعشرين الى السبعه وعشرين
احب الشعر وامارسـه والقصيـد كتـاب
عنواينه تبيّن لـي اللـي مهـوب يبيـن
لامني انشغلت اصك بينـي وبينـه بـاب
واذا شفت نفسي فاضي افـك لـه بابيـن
لكن الهجـوس الليلـه تحايـل المرقـاب
تبيـه ويبيهـا والقريحـه تبـي بعديـن
ولا ادري منين ابدا ولا ادري وش الاسباب
لكن ياهجوسي واصلي والعرب ممسيـن
انا يا هجوسي لا احتمى الماقف الغصـاب
لك الله ما اخيب في الرجى هقوة الهاقيـن
لواني مريض ومن صدوف الزمن منصاب
وفي القلب جرح وفي عمود الظهر جرحين
اباقف لـ.صكات الزمن مانـي بمرتـاب
مثل ماوقف لـ.الترك راكان بـن حثليـن
وابآرد علـى الجمّـه وابجـرّي الهيّـاب
مادامً لـي عمـرً مسجّـل مـع الحييـن
لين الله يزينهـا لنـا وتهـدا الاعصـاب
ويروق المزاج وننبسط والامـور تزيـن
واغني طرب واللاحـي الغربـي الهبـاب
ملاحات اناسة خاطـرً تكسـر الروتيـن
ياقلبي لاتحزن لو تشوف الدروب صعـاب
هذي عادة الايـام تقسـى ونـوب تليـن
وانا الله عطاني عقـل وادراك واستيعـاب
عيوني تقديني واشـوف الـدروب اثنيـن
امرّ اليسار الملتـوي واقطعـه مجنـاب
واسج القدم وامشي مع الغانميـن يميـن
والاعراب مايعرف حكاها سوا الاعـراب
وانا يعربي واحكاي واضح واعرفه زيـن
ولا اضحك مع الجاهل ولا اجامل النصاب
ولا ضاع عندي دين .. ولا غدالـي ديـن
مثل مالي اعدا في زماني ولـي اصحـاب
عسى اعداي والله فدوة اصحابي الغاليـن
رفيقي من الاجنـاب والا مـن الاقـراب
مقامه وتقديره على الراس قبـل العيـن
ينومسني الطيب لو انـه مـن الاجنـاب
ولا اداني العيّه لـو انـه مـن الادنيـن
قصير الشبور الخايـب العايـب الكـذاب
مصرحبها مبطـي واصرحبهـا ذالحيـن
علي الحرام اني لـ.ابيعه بسـف تـراب
ولانـي مليّـن جانبـي غيـر للوافيـن
واذا طال راس الحيه وطـال راس الـداب
عسى شرهتي ماتعطب رجيلـي الثنتيـن
وحمدي وشكـري لله المغنـي الوهـاب
إلاهي ويرحم عبـده المسلـم المسكيـن

.

انا ويني منها .. ذاللي قدلها حول عشرين ليل

عز الله انها غير غير غير يابوصالح

صح لسانك