[align=center]يقول مرشد البذال[/align]

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=sp num="0,black"]
البارحة يوم الخلايق ينامون= العين عيا لا يهملج نظرها
الناس تسهر مير ماهوب هاللون= ماخبر عين ٍ مثل عيني سهرها
لو ابو نايف وابو نواف يدرون = سهروا مثل سهري وهم في ديرها
والراي يرجع للعطاوي وبن عون= ربعي على صاف الأمور وكدرها
ربع على السمعه واهلها يحامون=ربع ٍ تونس خاطر اللي ذكرها
ربع ٍ بغال الروح دوني يفادون= وان عتمت دنياي ربعي سفرها
يادحيم صارت لي عراقيل وشطون= دويت بأفكار غزير ٍ بحرها
والا كما اللي بالصحاري يهيمون= تلعة يسندها وتلعه حدرها
وانا من اللي بالمواعيد يوفون= لاشك نفسي شين وقتي دقرها
دنيا ً تقلبني على لون من لون= تشوحني من بطنها في ظهرها
واليا نويتوا لابو سلطان تبدون= امير دار الجوف ريس بشرها
ردوا سلامي واحرصوا لاتغفلون= كلمة وردو للسديري خبرها
قولوا تراني منه شاكر ومنون=ذكراه في عيني تخيل صورها
انا لابو سلطان بالطيب مديون=ربعة وفا فعل الردى ماخشرها
ماني من اللي بالمعرفة يبورون= على الطمع والا المعرفة نكرها
وحياة من في رادة دبر الكون= اللي خفيات السدود اختبرها
ان السدارا ماأعتبر غيرهم عون=وحياة من زاد العمار وقصرها
من عهد شغموم بالالحاد مكنون= محمد عليه العين طول سهرها
اللي طرالي والخلايق يهرجون=قلبي نسى كلماتهم ماذكرها
لو ينغسل حبه غسلته بصابون= لاشك نفسي غسل حبه عسرها
مير العوض باللي له الناس يثنون= شخص ٍ وقف في ماقفه من هورها
صعصاع في فعل المراجل له فنون= والا الجبانه عن جنابه نزرها
ارجيه ظل لي عن الهيف مامون=قلبي قنع من ربعته واعتبرها
وزيارته فرض بها العمر مرهون=باولى السنه والا بتالي شهرها
لاشك انا عن حالتي ماتعلمون=ادوار حالاتي كبار ٍ عبرها
دنياي قامت تقرض العمر بالهون= واشوفها زادت علي بسطرها
حطت لي الحنظل على كل ماعون=عقب الحلاوة ذوقتني مررها
وانا ليا فكرت مانيب مجنون=اسمع بلذات السنين ودهرها
دنياي مادامت لكسرى وقارون= شالت مناصبها وهدت حجرها
وانا بشر من عرض من يستعبرون= انا من العالم وسيري بأثرها[/poem]


[align=center]رد عبدالرحمن العطاوي (( شاعر هوازن )) [/align]

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=sp num="0,black"]
يالله يامخرج من الكرب ذا النون=بدل لمرشد خيرها عن ضررها
باب الفرج ماصك عن كل مشحون= الله وعد عقب العسار بيسرها
الأجر للصابر يابو سيف مضمون= ودنياك كل يشتكي من غيرها
جددت لي يارشد لوعات وغبون= ونقضت جرح فالضماير حفرها
مافات خله يابن الأجواد مدفون= القلب وناته عتت ماخفرها
يوم انت تطري موت ابو زيد وشلون= تبي عيوني تستهل بمطرها
دنا الفنا فيها المخاليق يفنون= مالك عتب عمارها اللي دمرها
وان كان للداعي عزمتوا تلبون= حجة وفا نكسب فضايل عمرها
الجدي هقب سهيل ياللي تشوفون=ترى السدارى ماربح من خسرها
قوم ٍ لهم في ذروة المجد قانون= ماحد ٍيلوذ بجالها الا شكرها
اهل الوفا اللي للمجاريح يبرون= بالخص ابو فيصل مجدد سيرها
شرواك له من غير داعي يزورون= لاتعتذر عقب العزيمة نشرها
بينك وبينه عشر ساعات ٍ او دون= والحق تحي الكلمة اللي بذرها
على دلال زياد والناس يوحون= ومساعد الغزي وفيصل حضرها
واللي عليك من المحبة يمونون= وقلوبهم يارشد حبك وسرها
عليك ياواف المواعيد يرهون=وكل ٍ على مافي فواده ضمرها
والناس دايم يم هداج يردون= عليه يالبذال حمر ٍ جررها
من كل صوب ٍ يمه الناس يسعون= ومجالسه يجذب وفوده فنرها
واللي نصر موسى على قوم فرعون= ان السلاسل من كلامه دررها
الشعر عند الناس قيفان ولحون= وحاشاه فارق بيضها من حمرها
أدل في معناه من كدري الجون= واقوى كلامه من صمايل صخرها
شعارها اللي بالمحافل ييغنون= البدو واللي ساكنين ٍ مدرها
يازارعين الحنظلة ويش تجنون= حصيلكم منها مرارة ثمرها
ان ماحصل بني ٍ عن العيب مازون= معاني ٍ تنقاد للي وطرها
لابن ربيعه طاوعن وبن لعبون= واليوم ابو فيصل عليكم حجرها
له اعترف مليون مره ومليون=لوانها لي غصب كل ٍ وفرها
الا وريث النابغة وبن زيدون= واقت على رجم التغزل سبرها
الكل منهم بالغنادير مفتون= سود العيون محاورين ٍ حورها
ويامير حظ الناس من لك يناجون= مانيب راعي كلمة ٍ ماقفرها
اقبل سلام وعذر بن عون مقرون= وتحيتي ماهل وانصف قمرها[/poem]

[align=center]مشاركة في الرد من عبدالله بن عون[/align]

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=sp num="0,black"]
البارحة جالي عن النوم شاطون= لاجت تغض العين قلبي زجرها
من يوم غابت لين قاموا يصلون= والنوم عن عيني بقلعة ودرها
من حر موضوع ٍ على النون ملحون= هز المشاعر والحشاشه فجرها
نظم الأديب اللي عن العيب مصيون= اللي غريبات المثايل صخرها
مثايل ٍ تنقاد للي يعرفون=والا قليل المعرفه ماقدرها
تصعب على اللي بالمحافل يلالون= اللي تجمع عدلها مع عجرها
ناس ٍ بليا حرم راحوا يحجون= تبي مع الشعار ترمي جمرها
على هزيلات الكسايب يغيرون=واللي ذعرهم سابقي ماذعرها
وان شافت اللي يم الأدياك يشعون= قامت تهبد خيلهم من دجرها
لو انهم من طايل الكسب يحذون= خزيزتي ماحد ٍ يجي في نحرها
مرشد وابو نواف ماينتناحون= عرايس الأثنين يتعب مهرها
غاراتهم مغباش والناس يضحون= مير اني اشوا فكرتي من فكرها
وان كان يامرشد من الجور تشكون= وصروف وقتك شفت منها بورها
انصحك تقضب لك من الصبر عربون= النفس بعض مرار تكره خيرها
دنياك هذي كل يوم ٍ لها كون = ومن شاف سطوتها بغيره عذرها
يابو عبيد سافروا تستصحون= ادله وخل العين يقفي سدرها
ترى العيون اللي لها السهر مسنون= تدله ليا قام يتمادى بصرها
سج القدم مع ربعك اللي ينادون= وخمس الفوايد كلها في سفرها
انحر شيوخ ٍ في قدومك يهلون= عقب البطا مع زورة العيد زرها
روس الرجال اللي لمثلك يعزون= ماينعرف ورادها من صدرها
كل ٍ يعزك مير هم ينتبدون=هاك الحرار اللي تقنص فدرها
عشاقة العليا كرامٍ عن الدون=كل ٍ يعرف افعالهم ويخبرها
بافعالهم فوق الرجال يتعلون= اهل الفعول اللي تنومس اشهرها
ربع ٍ على بذل الندا مايفنون= هذا يثنيها وهذا عقرها
على دروب الطيب ماينتجارون= ودلايلة مامنهم احد ٍ هجرها
بأطرافهم تلقى الرجال يتلجون= مثل الجبال اللي يزبن وعرها
يحجون عن كثح العواصف ويذرون= وتجارة الامداح هم متجرها
بالخص ابو سلطان يالعقل مقرون= ليا كبرت القاله بعرفه بترها
شيخ ٍ له أصحاب الفخامة يخضعون= رام الشهامة والذمامة نفرها
مثايلة منهاالعرب يستفيدون= ويقطف من أغصان المثايل زهرها
يخوض بحر يفحم اللي يغوصون= جواهره للي تعب في دورها
ماهيب للي في ضحاحه يخوضون = اللي على الشاطي تنسف غترها[/poem]

الوضع ماهوب يازينه وياطيبه
الله يستر علينا من عواقبها

ابليس يرقص ويومي في مشاهيبه
وام الكباير تليّم في مزاهبها


ومسيلمه قام يفتل روس اشانيبه
يهوش وينوش وعيونه يقلبها


nofi3e@hotmail.com