قصيدة البسمتي ارجو ان تحوز على بسمتكم

[POEM="font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]ماودك تروف بحالة الناس يابوكاس= تر الناس يابوكاس عقبك مساكيني
ماغيرك يارز البسمتي في قلوب الناس= ولكن تعدى سعرك اميه وثمانيني
بطون العرب في غيبتك ضمّرٍ يبّاس= ولاغيرك يليّن جفاف المصاريني
لو ان شركتك جاها الدهر واعلنت الافلاس= وصلها من الشعب السعودي ملاييني
لكن ارفعت الاسعار ماهمها الاحساس= ولاقدّرت حال الضعوف الجويعيني
بغينا نقاطعها ونتبع صليب الراس= ابو هرجةٍ تنفخ كبود البعاريني
وطحنا مثل ماطاح عباس بن فرناس= يوم انه ربط جنحانها بالذَراعيني
بغا بين جيله ياخذ الطيب والنوماس= وحوّل على راسه بليا كراعيني
وذلحين يالدبوس لاترجي الدباس= هذا شكله مقلّد ومصنوع فالصيني
دخلت البقالة وامتلت كلبو الاكياس= وجيت المحاسب خابر انه يراعيني
ظرب لوحة الصرّاف واظهر علي قرطاس= والا مبلغٍ يخْلف جميع الموازيني
وقمت اتلفت والعرب كنهم حرّاس= احد ينهره واحدٍ يدز المواعيني
تقرّبت منه وقلت ياصاحبي لاباس= انا مامعي شيٍ يكفيك ذالحيني
ياليتك تسامحني وتكتب على الكراس= وتمّْهل علي وانا بسددك بعديني
قال العفو انا مانيب عنتر ولاجسّاس= ولاني كليب التغلبي كان توحيني
انا موظفٍ توّي قراري على الترباس= واقرب غلطةٍ صوب الشوارع توديني
تفضّل ترا الناس اطفشوا وانت مانت بحاس= وشوف السرا خلفك ولاعاد ترجيني
قلت الرجا في رحمة الله قوي الباس= والا رحمة العربان ماهيب تغنيني
رجّع كلبو الاغراض واترك لي ابو كاس= واخُذ قيمته لاكان بميه وتسعيني[/POEM]

سعـيد بن مقـبل الأكـلـبي
alaklobi@hotmail.com
ديـــواني المرقــــابي