تحيه طيبه للجميع

قصيده متواضعه

اتمنى ان تنال الرضى



‘‘ ‘‘ ‘‘ ‘‘



[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
انا ليـا منّـي بغيـت القصيـده=اختـار فكرتهـا واحـدد هدفهـا

وانحر لها الطاروق واقطع وريده=وأدعي بنات الفكر على شرفهـا

وأزهم خيال ٍ يلحق اللي يريـده=ماهو من اللي لاتكـاود حرفهـا

وألحق به الجزله لو انهـا بعيـده=واخلـي الهزلـه لمـن يلتقفهـا

ولاني بمن يفرح بما طاح في ايده=اللي يخم القافيـه مـن طرفهـا

البيت احسّب لـه واردّه واعيـده=ماهوب لحية صدفة ٍ من صدفهـا

لو كان مابينـي وبينـه وعيـده=لـه حـزّة ٍ يدريبهـا واعرفهـا

وأقـدّره وامـلا كفوفـه وازيـده=من جمة ٍ ماكـنّ حـي ٍ غرفهـا

وادفن موَصّلـة العلـوم الوكيـده=عن سطحي التفكيـر لايكتشفهـا

وأصوغها وأقول فرصه سعيـده=ونفسي لزود الهـرج مالله كلفهـا

وان كانها ماجات وصلة حديـده؟=والاّ على رب الخلايـق خلفهـا

والرجل يعرف من قصيده وجيده=والكفؤ تحسـب وقفتـه لاوقفهـا

ومن لاوطى حر الزمان وجليـده=ولاشكى جور السنيـن وصلفهـا

مـادل مقفولـه ولافـك قـيـده=ولارهن نفـس ٍ تزايـد شغفهـا

وانا اتعب لكسب العلـوم المفيـده=ومن لاشقى في زرعها ماقطفهـا

واصرف من اللي مايمد الزهيـده=والهيّنه مـن خلقتـه ماصرفهـا

بنك الهجوس العاصيات العنيـده=اللي ليا هالحين ماحـدٍ عسفهـا

أنـا وكيلـه والجزالـه رصيـده=ومن فضل رب البيت مانستلفهـا

ولا اجلب لسوق العقـول البليـده=اهل النبوك اللي تـلاوح ادرَفهـا

اجلب لسوق النـادره والفريـده=مثايل ٍ منها راعي الفكـر يفهـا

واطرب بها اللي يستمعني وافيده=ياهاوي الشعر استمعهـا وشفهـا

لاقلت انا عندي قصيـده جديـده=ياخذ شوي من الحرج ماوصفهـا

وتقول عنها اهل العقول الرشيـده=جزله وصح الله خفوق ٍ عزفهـا

[/poem]‘‘ ‘‘ ‘‘ ‘‘

وسلامتكـم