السلام عليكم ورحمة الله وبركاته

[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]

يالله ياجزل العطاء يالملتجى زبن الدخيل=مادام نسبح في بحر وذنوبنا كثر الرمال
عونك وقدّرنا على زرعٍ يجمّل بالحصيل=يوم الثقال بوزنها تعجز تقوم بها الجمال
حنا العبيد اللي تحمّلنا لنا حملٍ ثقيل=اللي تحمّلنا الصعاب اللي وبت عنها الجبال
يارب هوّن كل صعب وردنا ردٍ جميل=صوب الطريق المستقيم وعافنا ياذا الجلال
يالله عسى آخر موعد الدنيا سجودٍ وتهليل=أنت الرجاء والك ابتهالي ياسميع الابتهال
نبيد والدنيا تجدّد من مديلٍ في مديل=والحق والباطل تصارع من قتالٍ في قتال
نطلبك تعطينا القناعه في الكثير وفي القليل=رزقٍ يكفينا ولايطغي يكف عن السؤال
يالعبد قص الدرب واحذر لاتتيه عن الدليل=اليوم قدامك مجال وغد ماقدمك مجال
وأصلح مابين الناس واعدل واستعدوا للرحيل=مع منهج القاده هل التوحيد ماضين الفعال
كلٍ يجهّز عدّته في طرقة اليوم الطويل=والأمل مايصدق ودورة وقتنا دورة محال
رجلٍ يمثّل بالحصان بواجبه يصهل صهيل=شهم ولبيب وفطن لومال البشر يمشي عدال
واللي ينادى باسم غيره في الكتاب اله اسم اصيل=اللي يسمي في السماء واللي ينادى به خيال
دنياً تورّينا غرايبها وتمشي مشي سيل=والأمل يكذب لو يقول الك امش وأيامك طوال
والصاحب اللي صحبته ضحكة سنون وهرج ليل=ماهيب لاتنفع ولاتشفع هبالٍ في هبال
جعله يروح أبعد من القطب الشمالي عن سهيل=ليا مشى صوب الجنوب أنته توجّه للشمال
هذي نصيحه والتجارب للرجال أكبر دليل=وليا بغيت صحيب صاحب من صناديد الرجال
صاحب تقي اطلب كريم ولاتصاحب لك بخيل=ترى البخيل بخيل لو يملك ملايين الريال
من سمع قولي يعقله هزيل مايرفع هزيل=والدين هو ساس الرجوله والقناعه راس مال[/poem]