|
(*(( الصاحب ))*)
[poem=font="Traditional Arabic,7,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياصاحبي ماكلّ وقتٍ صفالك = بعض الليال تروّح اشكال وانواع
تعيش في دنياك هذي لحالك = احسن ولا تبقى مع انصاف وارباع
ياصاحبي يمناك واترك شمالك = واسمع كلامٍ من توحّاه ماضاع
الصاحب اللي لا عطيته وفالك = ماقام يكسر كل يومٍ لك اصباع
والصاحب اللي كل ماطحت شالك = ماهجّ عنك وغبّر كراع بكراع
والصاحب اللي ينشدك كيف حالك = لاشاف حالك بين شاري وبيّاع
والصاحب اللي ما بخس راس مالك = ولا طمع مع كل حاسد وطمّاع
والصاحب اللي مايهمّش وصالك = عشان يرضي كلّ حاقد وخدّاع
والصاحب اللي لا سمع عنك جا لك = وشرب معك فنجال شاهي بنعناع
ياصاحبي ريّح ويرتاح بالك = حظك ردي وانته تحاول ولا طاع
(وان قام حظك باع لك واشترالك = وان طاح حظك لاشرالك ولا باع)[/poem]
|