|
مبسم هـــيا ...
احبتي رواد هذا الاشم
متواضعتي تحتاج
منكم التفاتة
.
[poem=font="Traditional Arabic,6,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
لا لا تقولين آسفه غلطانه = منك الاسف عندي فلا له خانه
لا لا تقولي ما قصدت ازعاجك = ازعاج مثلك ينشرى يادانه
ما من خطا في دقتك لا هنتي= اصلا ..انا .. انتي دوا شريانه
دقي ورقمي فدوتك يا ترفه = والقلب لاجلك شرّعت بيبانه
يا مرحبا بالصوت مبدا يومي = صوت ٍ رهنّي في هواه رهانه
صوت ٍ يجدّد مبطيات امالي = صوت ٍ تعذّر لي برقم فلانه
صوت ٍ علي صبّح بصوت ٍ نادي = لا يا صباح الخير يا فتّانه
يرن صوتك في خفوقي دايم = رنّة غلا يا داعجي اعيانه
يشدّني شي ٍ جهلت اسبابه = في صوتك اللي تلّني تحنانه
لا دق جوالي حسبته رقمك= وافز فزة من فقد ورعانه
هذا لاني سابح ٍ مع طيفك = مع همسة ٍ شفقانه ٍ ولهانه
وشلون لو شفتك وشفت وصوفك = يا من لبستي للدلع تيجانه
اكيد عين اللي زمى مرقابه = حر ٍ تزمِّه للسماء جنحانه
واكيد جيد اللي تذيّرخايف = ظبي ٍ تعدّيه الخطر سيقانه
واكيد خد الجادل الرعبوبه = بنت ٍ وابوها يرتكي لاخوانه
واكيد حب اللول في مبسمها = مبسم هيا لا ما يصف وزانه
واكيد مجدول ٍ يشادي ليلي =ليلي وانا اللي بالهوى سهرانه
واكيد عود الموز يا معْزلها = ممشوقة ٍ مهلوفة ٍ رويانه
اليا اقبلت تفاحتين ولبه = واليا مشت بقفايها مليانه
واكيد عن باق العذارى نفتي = سبحان رب ٍ صورك سبحانه
واكيد انا صرت المعنّى فيمن = جدد جروحي في شذى ريحانه
يا لعنبو جد القصيد ان كاني = ما بحت سدّي من ورا قيفانه
فيمن سحرني في نباه وحسّه = كنّه على القيفان صاغ الحانه
صوت ٍ تعذر لي وانا وش عذري = من خافق ٍ عيّت تهيد اركانه
لكن مع الايام كوده يسلى = قلبي من اللي سكّرت غلطانه
كوده وليته .. والصحيح الواقع=ان الهوى فيني فرض سلطانه[/poem]
,
شعيل
,
انا قصيدي يوم اصوغ بيوته=ابيه دايم للنقا يرقى بي
وان كان ما هزَّت حروفه مُولع=فلا استحق اسمي يجي مرقابي
|