يقول ابن ذويبان ولايهون الجميع :=
[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
معنى على معنى .. و طرق .. و تراكيب=همي و تفكيري و صوتي و قافي
عزله عن العالم .. و حزن .. و مصاليب=دمع و سكوت و قطع وصل و تجافي
ليلة قصيد .. يِرّد عنها الأصاحيب=و على إنفراد .. اِتباح فيها الخوافي
يا هابس .. الدنيا متاهة سراديب=ماهي على ظنّك .. سحاب و فيافي
شف رجفة كفوفي على طارة الجيب=تنبيك عن رجف الضلوع الروافي
شايب ولو ما بان في راسي الشيب=الشيب في جوف المعاليق ضافي
في كل مره تشرق الشمس و تغيب=و انا على وضعي .. جفافي جفافي
إن شفت بوجيه العرب لي تراحيب=ما شفت بقلوب العرب لي مصافي
بعيونهم كلي عيوب و عذاريب=و أصدق عذاريبي .. سبب لاختلافي
هذا زمان الكذب و الغدر و العيب=ما هو زمان يعيش فيه السنافي
إن جيت أغنّي يقصر القاف .. و يشيب=و ان جيت انام الليل .. يقصر لحافي
و ان جيت أسولف للجروح المعاطيب=أعطبت فيني كل جرح متعافي
ضاق الحشا .. و الصمت يحتاج ترتيب=و انا على صمتي كتبت إعترافي
الأرض مالت .. و الفضا وضعه مريب=و أربع جهات الكون .. سجن و منافي
أكتب و لا ادري وين أودي المكاتيب=الموت قدامي .. و عمري خلافي
يارجل سجّي فوق روس المراقيب=من قبل أسوقك للبحر و المرافي
ويا راس و ان دارت عليك الدواليب=عن طيحتك .. تفداك روس الهرافي
ما طوعنّي زاهيات الجلاليب=و لا أكسروني لابسين القحافي
إن متّ .. موتي من كبار المكاسيب=و ان عشت ..( ُحرّ ) بوقفتي و أنصرافي[/poem]
نبا لعبدالرزاق الذيابي
|