منتديات المرقاب الأدبية - عرض مشاركة واحدة

09-06-2008, 07:38 PM

اه من بحر العيون اللي غرقـت ابقاعـه
مانجيت الاّ بعد مـاالله لطـف وأنجانـي
أرتطام الموج حطّم زورقـي واشراعـه
والأمل والشوق لو ..ماجابني .. ودانـي
كلها في ربع ساعه ..كيف لو في ساعه !!
يالله ألك الحمد وألك الشكـر يارحمانـي
السلامه عندي اطماعـه وخيـر اطماعـه
والحياه أغلى مـن المحـار والمرجانـي
من ضمن مرواحه أبطا ماضمن مرجاعـه
والمنايا ..والأجل ماصاب غيـر الفانـي
والصّويب اللي يشيل الجرح بين اضلاعه
لن سلم لاعاد ينشد عن وصـوف الجانـي
يعتبرهـا هوشـة ٍ ماجالـهـا فـراعـه
بين طعنات الرمـاح وبيـن شـي ٍ ثانـي
أن طلع منها يحصل خير مـن مطلاعـه
وأن دخل فيهـا وقـع فالنـار والدخانـي
مثل منهو يعمي أعيونه بـراس أصباعـه
لاقدر ياخـذ قضـاه ..ولايعلّـق عانـي
تكثر الغلطـات ونعلّـق علـى الشماعـه
فـأوّل الايـام مـدري فآخـر الأزمانـي
ان لقيت السوق غالي مالقيـت ابضاعـه
وان رخص تبقى البضاعه داخل الدكانـي
ومن سأل راع التجاره وين ضيع صاعـه
مالقى عنـده جـواب ٍ يخلـص الديانـي
والذهب غالي بعين اللـي شـراه وباعـه
واللي اغلى من هذا كله ..سكن وجدانـي
في حنايـا خافقـي مصيافـه ومرباعـه
وان بغا يسرح ويمرح ذاب مع شريانـي
كل ما اسرف في غلاه اتشين معي اطباعه
وان هجرته مابقى من طيف لـه سرانـي
كان ما للحب قيمـه ماحفظـت اوداعـه
شي عادي.. لو يذكرني ..ولـو ينسانـي

الله الله الله

صح لسانك يا محمد مليوووون
عز الله العزيز إنك ابدعت بما تحمله الكلمه من معنى
تقبل تحياتي , و سجل عندك واحد نفر معجب

أخوك/محمـــد ال عبـــدان