ساعة مسا تساهلت لعـب الاعصـاب
منها .! زفير الصدر يزهـم شهيقـه
ما غير افك كتـاب واسكّـر كتـاب
واشكي على ضيقه من افعال ضيقـه
دفعت لأحداث السهر كـلّ الاتعـاب
فـي ليلـةٍ ماهيـب ليلـه رقيـقـه
قلق ودوخة راس وحسـاب وعتـاب
وأزريت لا القـى للسلامـه طريقـه
لو تنفع الرجوى مع النـور لا غـاب
شحذت من بخـل الثوانـي .. دقيقـه
مدري من جروح المقاديـر منصـاب
وألا مـن جـروح الرفيـق لرفيقـه
تعوّدت نفسي علـى بـذل الاسبـاب
لو كنت احملهـا حمـل مـا تطيقـه
من لا يهاب النـاس ماهـوب ينهـاب
ومن لا قنع فالحال .! ما بـلّ ريقـه
مانيبّ اطـقّ البـاب لمسكّـر البـاب
لـو ان حجاجـه فالمواقـف طليقـه
للنفس حق ومن ورى الحـق طـلاب
والأمر من منجي النفـوس الغريقـه
أعوض حالي عن رجا الظنّ لا خاب
بالحـق نـورٍ مـا يغـطّـا بريـقـه
واقول للكذاب .. ليه انـت كـذاب .!
ولا اسكت وعينـي تشـوف الحقيقـه
واذا خسرت اصحاب واقراب واحباب
ربحـت مـع نفسـي علاقـه وثيقـه
ناصر مناحي
لله درك
من الاسماء اللي اطرب لقصيدها واتوق لجديدها
صح الله لسانك .. لافض فوك
كتبت واجزلت .. وسبيكة ذهبية مصبوبة صب
اعجابي + محبتي + متابعتي
|