السلام عليكم ورحمة الله وبركاته


حي الله النشاما .. لكم وحشه والعالم الله ,,


ابطيت من المرقاب العام وطرى علي مويضيع نبي له تفتيت وفكفكه مثل اماته اللي قبله ,,



من اهم ما يوصى عليه الرجل من صغر سنه ان يكسب وحده ويهرب من وحده .. والوحده هذي تندرج تحتها عدة (( وحدات )) .. طبعا ً الكلام هذا عند اخوان بدوا بس والا غيرهم !! مدري مدري ,,

المهم يوصى البزر يا صبي اتعب على (( ونعم )) وطق من (( الاخرى ))


عاد وان كبر هو ويمناه اما جاب ونعم والا وجاب (( الاخرى ))

الاخرى هذي لها عدة اساليب يستمتعون الناس في سردها والكوبه وال .. وال .. وال .. وال.. طبعا النقاط هذي كلها تندرج تحت وانتوا بكرامه !!


خلاني افكر في هالموضوع موقف صار :

جالسين في المجلس ونسولف وطبعا ً ما يخفى عليكم كل ما قل عدد الجالسين كل ما ازدادت الخطوره لعراقيب خلق الله

عرّض طاري الاول - واحد من المسلمين - ويقول به واحد من الموجودين ,, هذا رخمه هذا فيه ما فيه هذا ما ينفع هذا ما فيه بركه لو فيه خير سوا كذا وكذا .. وفند رائيه وشرشحه شرشحه ما عاد يبي غيرها ومن كلامه له الحق في رائيه .. لكن ما خلص من كلامه الا احد الشباب يدخل ويسمع آخر الكلام وقال لا لا لا لا لا يا فلان خاف الله .. والله وسبعين نعم بفلان .. وهو اللي يطيره سما !! وهذا ما سوى وهذا ما سوى ومن خلال كلامه ايضا ً له الحق في رائيه .. لكن انا والباقين في المجلس نسمع ونرى الاحكام .. بعد ما انتهوا .. قلت انا .. لا ما يصير الحين فلان هذا لا جا طاريّه نقول نعم والا نقول والاخرى ؟؟ !!

من خلال الرائيين وبعد طول المشاورات اتفقنا على مقولة كل ٍ يمدح ما واجه ..

وبعد عدة دقائق طلع احد الشعراء الشعبيين في احد القنوات يلقي احدى قصائده وقال الموجودين بصوت واحد (( قطعااااااااا )) ..

قلت يالربع ليه ؟؟ تعرفونه !! قالوا لا لكن هذا كريه

الحين اتفقنا على كل ٍ يمدح ما واجه ويذم ما واجه وهذا مسلم لا عرفتوه ولا تدرون وشهو وسيده لسبتوه !! .. طبعا ً ما بعد ذلك خارج النص


لكن سؤالي ... اللي سألته لهم واللي اسأله هنا ,,


والنعم ...


ما هو الحد الادنى المطلوب لكي يتحصل احد عليها ؟؟

وهل لها درجات ؟؟

ومن حب يعطينا بعض العناصر اللتي تؤهل لها فيا حبذا

والاخرى ان حبيتوا تولجونها وتولجون اهلها ترى المجال مفتوح !!



والسلام عليكم ورحمة الله وبركاته

@mubarak_abdulla

Mubarak.alkhalifa@hotmail.com