ناصر تراحيب

الحلقه الرابعه


× × × × ×


سجلا في أحد المنتديات .. وصار ابو عجايب يكتب قصيده لنفسه وقصيده لحمّاد .. ويردون على العالم .. لكن ماصار يرد عليهم أحد لإن قصائدهم يمشي حالها و علاقاتهم متوتره مع العالم .
ولحل هذه المشكله .. حماد .. قال الرأي عندي .. وانا ابوهندي .. وش رأيك نسجل بأسامي ثانيه و ( نطبل لإنفسنا ) وافق ابو عجايب .. وسجلوا ( شوق ) و ( الدلوعه ) وكم إسم رجالي ..
صارت قصائد ابوعجايب وحماد .. يجيها مدح ( غير طبيعي ) من شوق و الدلوعه والأسماء الجديده .. وتحركت قصائدهم ..وقاموا يسرقون قصائد بعضهم في المنتديات الثانيه ، وينوهون عنها في منتداهم الأصلي .. وصار لهم شعبيه ( مفتعله ) في المنتدى وفي أحد الأيام .. بدأت الشهره تلوح لإبو عجايب .. حيث جاءه إضافه على ماسنجره بإسم ( عاشقه ابو عجايب ) .. إنبسط ابو عجايب وعلّم حماد .. وقام ينتظر طلة عاشقته

وبعد أن تسمّر على المسن ( 24 ) ساعه .. تفاجاً بـ عاشقه ابو عجايب تسجيل دخول .
قبل تبدأ في الكلام .. غير نكّه ( ياجمهوري أحبكم لكن خفوا علي ) >>> مايعرفه غير حماد
المهم بدأ يتميلح عندها .. وبدأت المحادثه الآتيه :
- السلام عليكم
- عليكم السلام
- ابو عجايب
- - نعم الشاعر ابو عجايب
- هلا فيك اخوي
- هلا بك اكثر
- انا معجبه بشعرك
- حتى انا معجب بشعري ( يحالو يستخف دمه )
- ههههههههه واو دمك خفيف
- شاعر ورمانسي لازم دمي خفيف
- طيب باي ياعسل وبكره اشوفك

قفلت المسن ( وعاش ابوعجايب جو خاص ) حتى حماد صار مايكلمه ، ونوى يكتب فيها قصيده
قرب الكيبورد وكتب :

[poem=font="Simplified Arabic,4,red,bold,normal" bkcolor="transparent" bkimage="" border="none,4,gray" type=0 line=0 align=center use=sp num="0,black"]
متى يجي بكره .. واشوفك قدامي = يا أول جماهيري .. وأول محبيني
يافتنة أشواقي .. يا قمّة أحلامي = الشعر لك يكتب مسحوب وهجيني [/poem]

راح فيها ابو عجايب من أول محادثه >>> وشلون لو شافها والاّ كلمها
المهم .. راح ابو عجايب في خبر كان .
غير إسلوبه في المنتدى .. صار مايكتب الاّ بالالوان .. وصار رومانسي وقصائده لازم يقول فيه ( اشتقت ) و ( أحبك ) و ( الورد ) وكل الكلام الناعم
إستمر ابو عجايب وحماد في المنتديات وكل واحد منهم وخاصة الأول .. صار ماسنجره مليان معجبات ..
في أحد الأيام كلمته ( مجنونته ) الآولى .. وقالت أبا أكلمك .. جوال . إنبسط ابو عجايب وعلى طوول كتب الرقم .. دقت عليه وسكرت .. ودق وردت .
كانت الصاعقه على ابوعجايب / مجنونته ( رجل ) يوم كلمة وهو يضحك ( هاهاهاهاهاها ) يابو عجايب يا دلخ / إثقل شوي .. يا ( .... ) .!
وترى إدارة المنتدى .. كاشفةٍ تطبيلك لنفسك يا ( حلو ) هاهاهاهاهاهاهاها
ابو عجايب إنصدم .. وماعاد بهي لحية ( جرح مشاعر ) اللي تعوّد عليها .. هذي صفعة على الوجه .
حسّ ابو عجايب إنه فقد بريقه في المنتدى .. هذا
وأتفق هو وحماد .. ومعهم كم واحد ( إمّعه ) على ترك المنتدى وتأسيس منتدى ثاني .. يكون له
فيه الكلمة الأولى .. أسسوا منتداهم .. وكانوا يعتقدون إنّه يبي يضرب كل المنتديات .. صارت بدايته متعثره .. وجاك ( مستشار الفلس ) حمّاد .. وقال .. إخذ الرأي .. قال .. تم .. لكن وش هو .. قال .. خل الأشراف كله أسماء نسائيه .. وصورهن الرمزيه .. أحلى الصور .. وشف ( المخفّات ) وش يسوون ..
فعلاً نجحت الخطه .. وصار كل عضو .. يفرح إذا ردّت عليه ( بنت ) وقالت شرفت الدار .. وأرسلت له ورد .. ورساله خاصه .. فيها اسعدني تواجدك .. واضفني ماسنجر .. صار كل عضو مضاف عند مشرفه .. والمشرفات .. هن ( ابو عجايب ) وحماد ضحكوا على الناس .. وحركوا منتداهم .. كم شهر .. وآخرتها .. إنسحبوا الناس من عندهم .. لإنهم إكتشفوا إنهم .. دايخين .
وبقى ابو عجايب وحماد .. واسماءهم .. المفبركه .. ثم إكتبوا على المنتدى .. ( للتقبيل )

هجر المنتديات ابو عجايب .. ومع ذلك لازال يبحث عن النجوميه .



الحلقة القادمه .. يتجه ابو عجايب للأمسيات .. لكن هل ينجح ..!؟