الهوازنيه للشاعر ثواب بن طنف الجعيد

هذه القصيده احد روائع الشاعر والشيخ ثواب بن طنف الجعيد رحمه الله ......





[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
سبحان محي الارض من بعد موتهـا=ولولا العنايه كان ماخضـر عودهـا
حنت عليهـا المرزمـات الغـوادي=يرجع بها المسني ليا اوحى رعودها
كن البرد حول الحصى حيـن ينتثـر=جوهر عذارى نثرت مـن عقودهـا
غدرانهـا سفـاح تزهـى رياضهـا=ريح العوالي في المحانـي تذودهـا
تغرد بها الاطيار مـن كـل ناحيـه=مـن الطـرب حدارهـا وسنودهـا
تلعب بها الاشواق حتـى تجاوبـت=واسترسلت من شوقهـا مجهودهـا
وجاوبتها بالصـوت مانـي بعاشـق=لكـن افكـار الضمـايـر تعـودهـا
ان جيت ابا اقهرها تضايق بها الحشا=وان جيت اناحيهـا تزايـد ورودهـا
كنيتهـا فـي خاطـري واتعبتـنـي=ولاتختفي دعـوى تبيـن شهودهـا
تسعى لنا الدنيـا وتطـوي عمارنـا=وبيـض الليالـي ماتعلـم بسودهـا
عزوم ٍليا قفت غـرورٍ ليـا اقبلـت=مكـارةٍ بـواقـةٍ فــي عهـودهـا
ان جيت احاربها واحـارب نعيمهـا=روحـي تباهـا والامانـي تقودهـا
وان قلت اجد السير اباهـا تعـذرت=وهي نومست ناسٍ هتيلـه زنودهـا
تنومس هتيل حربتـه لابـن عمـه=دايـم مولمهـا وراكـز عمـودهـا
دايم مولمهـا ويطعـن بهـا القفـا=والطيبه مـن خلقتـه مـا يفودهـا
وعزي لقومٍ ينـزل البغـض بينهـم=بالتفرقه والبغض تشمـت حسودهـا
ومن عرض اقرابه لعـوج الطلايـب=يذهـب معزتهـا ويكثـر زهودهـا
ويقطع هبيلٍ حكمتـه عنـد حرمتـه=يبدي لهـا سـده وتبـدي سدودهـا
على بسـاط البحـث بينـه وبينهـا=يبدع لهـا كلمـه وياخـذ ردودهـا
حتى ايش لو كانـت حياتـه طويلـه=عسى حفرته في سرع تطوى لحودها
وتـرى تفاصيـل الرياجيـل واجـد=يتعـب مغنيـن المثايـل عـدودهـا
عرفـت لـي منهـا معانـي كثيـره=خابـر ثعالبهـا وخابـر فهـودهـا
تـرى الثعالـب مـا تغيـر عيالهـا=لو كـان تنقـش بالزمـرد جلودهـا
والحر الاشقر ما سكن فوق عرفجـه=لو كـان مالـت بالثمـاري فنودهـا
ومن لاتنقـى فـي المناسـب تنـدم=وروح الفتى تزهيدهـا مـا يزودهـا
واناعتيبـي مـن سلالـة هـوازن=ربعي عوايدها الفخر مـن جدودهـا
ما نوشي الفتنه ولا نحـرث الـردى=ولا نهـاب اليـا تسامـت وقودهـا
ان ميل الميـزان مـن قـوم يمنـا=صبرنا لها لوكـان كبـرت لهودهـا
وان ميل الميزان منـا علـى العـدا=نروي من السم السقطـري كبودهـا
رسمنا الثلاث البيض فـي الجاهليـه=واقرهـا الاسـلام واثبـت حدودهـا
من لاومن جاره فـلا هـو بمؤمـن=واهل الشرف للجار تبـذل جهودهـا
ومن لا اكرم اضيفان ما هو بمؤمـن=واهل الكرم جادت على قيس جودهـا
ومن لا يعدي عـن خويـه بسيفـه=خساره على سبلاه تسكـن خدودهـا
ساهمت باابيات الشعر فـي محلهـا=مع جملة الشعـار لا جـت وفودهـا
نفخـر باصالتنـا ويفخـر مليكـنـا=تحت راية التوحيد ثابـت وجودهـا
ملكنا امـام الشعـب قايـد جيوشـه=فيصل سعدها فـي ليالـي سعودهـا
واخوانه الاحرار نصره علـى العـدا=نمورٍ يقهر كـل طاغـي صمودهـا
والمملكة من غربهـا ليـن شرقهـا=ان حك حيـدٍ حيـد حنـا جنودهـا
اموالنـا وارواحنـا فــدوة لـهـا=نسخـى بهـا لسهالهـا واحيودهـا
ويحرم عليهـا مـا تزيـن لغيرنـا=لو غطرفت بقعـا وساقـت قعودهـا
تمت وصلى الله على خيـرة المـلا=اللي هدى الكونين بامـر معبودهـا [/poem]