اشارات القيامه

توكلنا على الله واستعنابه عظيم الشان
عظيم الشان بأمره لاومربه بين كاف ونون


اطيورن ماتطير مع الطيور ولا لها جنحان
ماتشرب من قراهيد المطر تشرب من الماسون


لو ان الحظ يرفعها سماء تمشي مع السيسان
ولا فيها مخالب صايده وسنون ماش سنون


كشفنا صفحة التاريخ ماسجلها عنوان
مثل صفرن شمال الرقم مايحسب من المضمون


لو ان الوقت يضحكله طرب ولا فصيح اللسان
سوات العهن في نحر الهبوب انزاد ولا دون


اليا وزنت رجال المرجله يرجحبه الميزان
سوات الحبه اللي ناشبه في قاعت الماعون


لا والله مايقولون الرجال افلان مثل افلان
انا اعلم واتعلم واعرف الداين من المديون


زمان العام يوم ان المطر يمطر من الربان
احد يمشي معه وحدن تذرا بالذره مدفون


نهارن فيه بيع ومشترى والملح والدخان
تحري ياصحافه واكتبي لاجيالها يدرون


هذا وقت المظاهر والتطاول بأطول البنيان
يطالعها العمى ويطالعه منهو سليم اعيون


درينابه وعلمنا الامين امعلم القرآن
اشارات القيامه علمه فيها عليم الكون