هذه نصيحة للشيخ عبدالله بن دخين الذويبي

قصيدة من أمهات القصائد ..ونادرة من نوادر الشعر ..والحكمة ..والنصح ..
لوحة من حياة خالدة الذكر لمن يبحث لنفسه عن ذكرٍ بعد الموت ..فالذكر للأنسان عمر ثاني ..
هذه القصيدة للشيخ ..والشاعر /عبدالله بن دخين الذويبي العتيبي رحمه الله .
شيخ قبيلة الذويبات ..و أحد رموزالشعر .. والعِرف ..والحكمة في قبيلة عتيبه ..

رحمه الله ..وأسكنه فسيح جناته ..

وما أصافحكم به سوى( نموذج بسيط) من شعر سار به الركبان ...وأنشده كل محبٍ للشعر ..والحكمه
صاغ فيها أجمل ماقيل في الحكمة ..والنصح ..
ونحن نقوم الآن على جمع شعره في ديوان ..يروي حياته ..شعره
لكل من يبحث عن ثمين الشعر ..ونادره

اليكم ...
[POEM="font="Simplified Arabic,4,black,bold,normal" bkcolor="transparent" bkimage="" border="outset,4,gray" type=2 line=0 align=center use=ex num="0,black""]الأوله يالله في حسن الأعمال=ياخالقٍ روحي وعالم باجلها
قال الذي يبني جديدات الأمثال=ولا كل بيبان الشعر مكتملها
أبني هواجيسٍ عريضات وطوال=واسهر على البن اليماني لاجلها
يطرب لها الخاطر على شرب فنجال= ولا أدري وش اللي فالعرب يطرب إلها
قدامنا كم من تمثل ومن قال =عوارفٍ وأقوالهم مانــصلها
وحنا نمشيها مع الدهر لا مال =وكلٍ يوّرى جابته ما مثلها
وياما بدانا في عسيرات الأطلال=وياما مشانا بالقدم في سهلها
وياما لبسنا من جديدٍ من العال=وياما سترنا الروح بادنى سملها
وياما تنطّحنا المواجيب عجّال=نعجل لخطار العشا وانعقلها
من حايلٍ مابين بايع ودلال=نرضي مربيها بسلمٍ بدلها
وياما تعذّرنا على تمشية حال=والروح نكظم غيظها من خجلها
ومن كان فالماجوب يبخل على المال=عسى يمينه يابسه من شللها
وياعبيّد أبوصيك ياطيب الفال=وصّيةٍ من طاب حظه قبلها
الدين للدارين ساسٍ ومنزال=وياسين كم قدامنا من نزلها
وانهو عن المنكر بلا رّي واخيال=وكلمة هل المعروف بالجد قلها
وصون الأمانه عن خبيثين الأعمال=تعرف خبيثين العمل من عملها
واحذر من الصعلوك لاحل واحتال=وكيل دنيا والأمانات أكلها
متلبسين الدين برقِي وختال=وانشاف غرات الموالي ختلها
ويكفيك عن ما اوصيك عرفك بالأنذال=ومن يصحب الأنذال يكسب نذلها
ومن جالس الأنذال يتهم بالأخمال=لن كان تعرفها وتعرف خملها
ولا تفتخر بمعرب الجد والخال=ماكامل ألا من يكمل خصلها
وكم من عريب الجد والخال مازال=يمشي مماشيها ويفعل فعلها
يقولون فالدنيا غيارات واميال=وهذي سواليف العرب من جهلها
الله خلق دنياه وايام وإلـيال=في دبرت الله ماشيه في عدلها
ما الغيره ألا من تِغيار الاجيال=مابين شد إرحالها من حللها
غوغات جيل مستخفين زعال=فالدين والشيمه كثيرٍ كسلها
وإن جا خصومه بين خصمين في حال=كلن تولم واشترك في جدلها
ودقوا مزاميرٍ وزيرٍ وجلجال=وقاموا لها صفين من دون أهلها
وحطوا على الخصمين مقفا ومقبال=ويرمون مابين الخصوم ابدقلها
والخير فاللي للشرابيك حلال=بيبان حق إليا فتحها دخلها
والصدق ينجي فالمخاطر والأهوال=ويبدي علامات الرجال وعقلها
والكذب إله كيال ويجيبه أحمال=معاشر الكذبان لا تضحك إلها
واليا ضحكت ايحملونك وتشتال=ويقولون إلك بالمِد والصاع كلها
ولاكل من يزهابه الثوب رجال=ولا كل من شال الحمايل جملها
هذي نصيحه ياعبيّد من البال=يجني ثمرها كل من يسمع إلها
وصلاة ربي عد ماهل همال=على نبيٍ والأمانه حملها[/POEM]

الشيخ الشاعر/عبدالله بن دخين الذويبي العتيبي..رحمه الله