برج الفيصليه

[poem=font="Simplified Arabic,6,darkred,bold,normal" bkcolor="transparent" bkimage="" border="none,4,gray" type=2 line=0 align=center use=sp num="0,black"]
نسنس الغربي وهيضني نسيمه= والمزون اشوف فيها البرق ياضي
ضايق وعندي على المسرى عزيمه= والمراكز فاضيه والخط فاضي
فوق من يشفق على قطع الخريمه=مثل ما نشفق لتوزيع الاراضي
حاجزه بدري وتلّيته بقيمه=مادخل فيها وسيط ولا تغاضي
ومن اخوه أخذت لوحته القديمه= راضيٍ بارقامها واخوه راضي
ميزته فكسار واوصافه عديمه=ولونه اسود كنه رموشٍ غواضي
فل شكل .. وفل وصف .. وفل بيمه=يالله انك تحفظه من لنقراضي
مصنعه يصنعه من عام الرضيمه= وتو ماوصلو لشكله لفتراضي
(على تصميمه وشيٍ في صميمه=اللهم لاخلاف ولا اعتراضي)
في وقوفه هيبه وقدر وحشيمه=كنه شيخٍ باركٍ له عند قاضي
وان سرى في ظلمة الليل وعتيمه=كنه طارٍ له ثلاثين الف حاضي
كل ماشاف الخطوط المستقيمه=انتهض مثل اشقرٍ فيه انتهاضي
هدته تبعد من الخفاق ضيمه= لا لمح جول الحباري فالفياضي
يقبل اقبالة بطل ولا صتيمه= واردٍ على هلاكه فالحياضي
كن نوره لا نطحته برق غيمه=وان دبرته ظهر عودٍ قده قاضي
صورة الرادار ماتحسب قسيمه=يختلط فيها السواد مع البياضي
منوة المظلوم في سجن الظليمه=راح من عمره سنينٍ ماتعاضي
من صواديف الزمن نفسه سقيمه=وفوق صدره من لضى الايام لاضي
ودي اسرّيه واعديه تيمه=واقطع فجوجٍ طويلاتٍ عراضي
لين اجي دارٍ لها حشمه وقيمه=مبطي منها ولي فيها مقاضي
ديرة رجالٍ مواقفها عظيمه=سجّله تاريخها حاضر وماضي
فعلها بين العرب مثل الوسيمه=كنه برج الفيصليه فالرياضي
سجةٍ معهم ولو ساعه يتيمه=تبعد همومي وضيقي وامتعاضي
رحت ادّور راحة القلب ونعيمه=وابعد من اللي على الزلات ماضي
واحدٍ لاقلت يامال الغنيمه=ارتفع .. قال انت يابن الناس فاضي
طر جيبي من فعايله الوخيمه=لامتى وانا بما يفعله راضي[/poem]