متون سمراء

ياحمود خذني للمكان النحاوي=اللي مواسدة النسا يجهلونه
لو ان منهاجه حيود وملاوي=بمتون سمرأ تسرق الليل لونه
يحد من هقوة بعيد الهقاوي=ليا زما قلع المراميس دونه
دوّه من رعاة المواشي خلاوي=حاميه لاهوف الضما مايجونه
ارضه من الوحشه تخيف الجلاوي=الزول والمخيول ماله نمونه
ظلامها اظلم من ضحي العماوي= وضحيها ضوح السراب مخزونه
اصواتها شادي وضابح وعاوي=وسكاتها همس وهدوء وليونه
اشتاقها شوق المحب الهواوي=شوف العيون ام الرموش الفتونه
علاج جرحي والطبيب المداوي=عن مجلسٍ يدمي الظهور بخشونه
ملم متغطرس وهازي وغاوي=للمدح سب. وسب. من يمدحونه
ناسه تونسها لجاجه رغاوي= ترغي لها هيما الفراق الدجونه
روسن تولفها الحيل والرجاوي=وقلوب يخلفها الوفاق وتخونه
الحسد منها شبع والخبث راوي=وافواهها جوعا كلام المهونه
ما للحميا في طرفها حراوي=كريمها مقلول فزعه وعونه
جود اللعاوي بالزمان اللعاوي=متولمن ضد القرابه بشونه
صار الحذر يملا الصديق المخاوي=ماعاد به صدقان عون ومعونه
الاانت يامذخور ابوي النداوي=من طير شلوى فيك عزمه وكونه
فيك الوفا والاحترام امتخاوي=ياخوي يابشت الوقار وزبونه