اللي رفقته كنها ثوب قصير

احبتي اعضاء وزوار منتدى المرقاب السلام عليكم هذه مصافحه لكم بعد طول غياب ارجو ان تنال استحسانكم
[poem=font="Simplified Arabic,6,black,bold,normal" bkcolor="transparent" bkimage="" border="groove,4,darkblue" type=2 line=0 align=center use=ex num="0,black"]

الا ياقدم رجلي عذرتك عن المجلاس=مع اللي سوالفهم ماهي قد ميقافي

اخشى كلمة تنقط صوبي ونا حساس=واخذ من وراها بلشة من ولد هافي

والا كلمة عن كفو يبدي بها بلاس=وده يوقد الفتنه ولو جمرها طافي

ماودي تجيني من رفيقي عريب الساس=ودي موقفه يبقا مثل ما اخبره وافي

لن الهرج شوك كبود يكبر مع الوسواس=ويبحث مدا الرجال ويبين الخافي

مجلس بادعين الزور مجلس خواء وافلاس=ياكافي من المجلس ومن فيه ياكافي

اخير منه مجلس رفيق رهيف احساس=يعرف غايتي قدام وانا بعد لافي

رفيق يوم ان الناس خلقوا عدد واجناس=لبيب ولماح وفطن وعرافي

عسى الله يجيره من صدوف الدهر والباس=وعسى الله لايقسم على مثله خلافي

لنه كفو وأصل الكفو عملة ذهب والماس=مايلقا لها صرف مع كل صرافي

ولنه لزلات الرفاقه ستر ولباس=يسمعها وكنه لاسمعها ولاشافي

ولنه سواة البحر فالعمق ماينقاس=يلحف سد من يستأمنه ستره الضافي

ولـــ0اخطيت خوة كاسب المدح والنوماس=تعوضت عنها طلعة فوق مشرافي

مشراف طويل نسمته تنعش الانفاس=احلق بفكري في سما جوه الصافي

امد النظر من مرقبي واطرد الهوجاس=وابهر دلال الفكر وازين القافي

جو البر والخلوه مع بارد النسناس=لها خافقي دايم شفوق وميلافي

ابا ابعد عن اللي خوته مثل ضيم الراس=عسى الله لايبلا بها كل متعافي

اللي خوته ثوبٍ قصير عن المقياس=لاهو ساتر يقبل بوضعه ولا دافي

لامنه ارفعه راعيه ساقه بدت للناس=ولـ 0ارخاه بانت للملا روس الاكتافي

ابا ابعد وسج الرجل خير من المجلاس=مع اللي سوالفهم ماهي قد ميقافي

ناصر علي الحارثي ( هداج][/poem]