وساع النحايا .. لتركي بن حميد

السلام عليكم .. مساء الخير على الجميع

هذي مجاراة لأبيات الشيخ ( تركي بن حميد ) رحمه الله ..اللي يقول فيها :

لا والله الا اقفوا وساع النحايا=ما هلّلوا ولهم على الحزم معلوق
يتلون من تبدى عليه الخفايا=عقله رزين ومغلق(ن) له بصندوق
يبون برّاق(ن) صدوق العشايا=تشبع رعاياهم بعرفج ورقروق
أقفوا بغرو(ن) مايطبّ القرايا=تجيه حاجاته وهو مايجي السوق
أنا مريض ودّوروا لي دوايا=من ما البرد والاّ ترى النقع مطروق


وأنا أقول في المجاراة :ـ

تهتز من رجف الخفوق الحنايا = مثل الرعد لا هزّ الآكام من فوق

من صرقعة صوته تموج الشوايا = كنّه يبا ينزع من الجوف معلوق

إليا ذكرت متعّبين المطايا = يوم الحياة من العناء مالها ذوق

عاشوا كرام وطاهرين النوايا = روسٍ تجيب حقوق وتودي حقوق

واليوم يندر جنسهم في البرايا = واتلاهم تشوفه مهمّش ومفهوق

إلا مَن عياله تضمّ الوصايا = وساقت على شوره مطاليبها سوق

اخذوا من العصر الجديد المزايا = واستعملوها للمطاريش والنوق

تتبع عطايا الله ونعم العطايا = ورث الرجال اللي حموها من البوق

على جيوب مقفّصات وحنايا = وعلى الحيا تنزل قبل كل مخلوق

اقفوا بمستور الحلى والحلايا = صغير سن ولا بعد صار له شوق

ويبين لك بالكاد بعض التهايا = ومن الحيا كنّه مقيّد ومخنوق

وربعة لما يطلب حضور وفدايا = وهو مستريح .. وكل مطرود ملحوق

ما صاب تركي في ( وساع النحايا ) = على وليفه .. صابني منه مطبوق

والصبر لو يفهق سهوم المنايا = صبرت ما كنّي على الصبر مسبوق

مير البلا ان الحب جاله ضحايا = ماهوب ضيقة خاطر .. شويّ و تروق

وسلامة ارواحكم

* تنسيق القصايد فيه مشكلة .. لذالك لم استطيع التنسيق