(يقمز به الجني على الذيب سرحان)

[poem=font="Simplified Arabic,5,black,bold,normal" bkcolor="transparent" bkimage="backgrounds/47.gif" border="none,4,gray" type=0 line=0 align=center use=ex num="0,black""]
عنوانها عندي وحنا العناوين =ولاعناوينك لها كم عنوان
عند العوارف تستقر الموازين=والشعر له عند الرياجيل ميزان
والشاعر اللي عملته بين قوسين=تسعيرته ماهي على كل دكان
تاجر وله فالسوق قيمه وتثمين=ومن دونه أثمان ومن فوقه أثمان
واللي خلط سيف الذهب بالسكاكين=ماهوب جاهل قيمة السيف شامان
ذي حيلته لاصار ماهيب سيفين=والعجز ماهو عيب في بعض الاحيان
العيب غط النور والمسلك الشين=ياللي تغط النور بيديك غلطان
غيرك معه عينين كان أنت أبوعين=لاتحسبنك يالعور بين عميان
ليا وفى صاعك نكيله بصاعين=وأن ماوفا صاعك فلا هوب نقصان
حنا نزوده بالثنا فالدواوين=وتصيرلك منا شهاده وعرفان
يابعد فرق الشوف عن سمع الاذنين=عكس الذي نسمع نشوفه بالاعيان
وين احترام الشعر يالمحترم وين=وإلا مغير أمثال فاضي ومليان
والنقد والتقييم والخلق والدين=وانكار حب الذات والحسد يافلان
والا كل مشروع يدر الملايين=وإلا عصا موسى وخاتم سليمان
أوالزمان اللي يحوس القوانين=يقمز به الجني على الذيب سرحان
ماتلحق الشكات كون الرديين=وقد قيل راعي الأوله ماله أقران
ونلبس الضابط وسام ونياشين= لابان له مجهود وإخلاص واتقان
بين زملاه نكرمه فالميادين=وهذا نظام لكل قادات الأركان
بعض العدود دليها تلحق الطين=وهداج دلوه بأزرق الجم مليان
من ثعلب الصحراء يارومل اروين=ياثعلب الصحراء يارومل أروان
أصغر بواخرنا غطت بحر قزوين=وأكبر بواخرنا إذا حل طوفان
وان كان ماتدري ترى الناس دارين=وان كان ناسي آفه العلم نسيان
مير العواجه في رقاب البعارين=عجزت تعدلها مشاعيب الانسان
وموشحات الاندلس والتلاحين=زرياب رونقها بزينات الالحان
واظفت على النوته جمالٍ وتحسين=والعين يجذب دمعها همس الاحزان
وفي وفرت التنباك رخص الغلاوين=لوكان أنا مانيب شراب دخان
ظرمت للفنجال بين الصلاتين=من باب حب الكيف وطوال الايمان
وعودت بعماسي من المجلس الزين=ومن الصلف ماأوحيت أنا صوت الأذان
وأعوذ بالله من جميع الشياطين=ولياقرينا ينخزي كل شيطان
من بين كاف ونون كونً وتكوين=وأسرارها يعلم بها عالي الشان
[/poem]