أنا عن الشاعر تراحيب أبا أنوب ..

السلام عليكم ورحمـة الله وبركاته


هذه القصيدة مجاراة لقصيدة الشاعر هادي بن شنيف والتي كان مطلعها
جات الطواري واغصبتني غصيبة .

الرجل تقبل وقفته عن قريبه = وأنا عن الشاعر تراحيب أبا أنوب

هاجوس هادي طلّعه للرقيبة = كأنه على رقي المراقيب مغصوب

وكثر الطواري قرّبت له حضيبه = وغنّى من ألحانه هجيني ومسحوب

وفكّرت أبو سلمان وش يدّعي به = والرجل لا طالب ولا هوب مطلوب

مادام هادي فوق كور النجيبة = وريمه رسنها في يد الشيخ مقضوب

يسرح ويمرح بين صفوة عتيبة = أمن ورخا مافيه ناهب ومنهوب

ومن يتّجه صوب العلا نقتدي به = ومن حبّه الله صار للناس محبوب

ورفيقي اللي فاللزوم أعتزي به = وأقول أطيعه نوب ويطيعنا نوب

ومن لا استمع في راينا وش نبي به = لا نافعٍ نفسه ولا قاضيٍ نوب

وبعض الأوادم قربهم بندعي به = يغوّي الجهّال ويلوبهم لوب

ولاني مع الجاهل ولا مع صحيبه = انا مع اللي دوم للحق منصوب

خلّك على اعقاب الدلال الربيبة = والهيل فالمصفاة والضو مشبوب

والنجر دنّه لين يسمع قنيبه = صوته يجيب الجار من دون مندوب

واشرب زلال الكيف واترك سريبه = وأنته تحب الكيف والكيف مرغوب

وقولة نعم تبغى كفاح وضريبة = محدٍ لقى نعم فالسوق مجلوب


وسلامتكم