وادي الرمة!

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
(وادي الرمه)..طير القطا هاجر وقطعان الأرام=راحت لها عامين ما مرتك يا (وادي الرمه)

العام أمرّك واطلق الناقه وافكّ لها الخطام=ترعى وناري تشتعل ودلال كيفي والمه

والبارحه مريت بك ساعه ولا طال المقام= من وحشة ٍ تجري مع الشريان وتخالط دمه

وين الخزامى والنفل والما وعيدان البشام= وين الورود اللي على جال الركيه حايمه

وين البدو وين المراعي والمضارب والخيام= والراعي اللي كان فيك العام يسرح بغنمه

معقول كل اللي من اول فيك خانوا؟ يا حرام= معقول ما باقي وفي غيري وكم غصن سلمه!

كم هزني منظرك يا الوادي و صوتك يا لحمام= اللي شلع قلبي بترنيمه ولحنه ونغمه

البارحه مرت ثقيله برد ورياح وظلام= يا قشرها لا مرت الليله ثقيله مظلمه

صاحي وهي من ثقلها عيا يطيب لها المنام= وانا ما غير ارقب متى تنعس عيون الظالمه

يوم نعست ما نامت الا بين لحمي والعظام= يا ويل من ليلته نامت بين عظمه ولحمه

يا ليل ضيمك زاد عن حده ومثلي ما يضام= ما كل ظهر بعير لا صابته قشه تقصمه

والقشه اللي طاحت البارح على راس السنام= لو ما تحملها الجمل كادت تكون القاصمه

والهرج مثل الملح نقصه مثل زوده فا الطعام= إن قلّ غيّر بطعمه وان زاد غيّر بطعمه

كنت أوزن الكلمه واعايرها على المليجرام= من حرصي إني ما ابخص أصحابي لو بوزن عجمه

وابدي الصاحب على نفسي ولا فيها ملام= واقطع رغيف الخبز ما بيني وبينه واقسمه

واصحابي اللي كنت اعلمهم على رمي السهام= أطيبهم اللي يوم علمته رماني بسهمه

ما جيت مجلسهم عشان اصبح محل الا هتمام= ما جابني غير الصداقه والعلوم الغانمه

والا القصايد ليش انافسهم وانا اللي فا الامام= لو يطرد احسنهم وراي يموت ويضيع نسمه

وان حاول يجاريني انظر له بضحكه وابتسام= واقول حظ اوفر وفرصه يا صديقي قادمه

وانا ادري ان الشعر له ناس وقوانين ونظام= وان الخليل ابن احمد اول من بداه ونظّمه

وانا كريم ٍ حده الله فوق مأدبة اللئام= أكلوا وهو جالس ولا واحد تكرم وعزمه

أبقى كريم ولا أمر بعصري مرور الكرام = ألاّ وأنا ناقش على صدر الليالي ملحمه

الله وهبني ملك حرف الضاد واصبحت الإمام= واكرمني بمزمار ابن داوود مدري خاتمه

وانا النبي بعد احمد المتنبي ومسك الختام= تبقى تعاليمي نبوة والرساله خاتمه

شاعر بكلمة قوم الدنيا وقعدها وقام= يبغى يغير خارطة عصره بفكره وقلمه

يعني إذا قلت لك حرف الكاف ماهو كاف (لام)= صدق كلامي واعتبرها قاعده ومسلّمه

يمكن يجي لك يوم تفهم وش مرادي والمرام= لا وقف عقلك بين حد الواضحه والمبهمه

أحيان اسوي بيت واحد فا السياسه والغرام= حتى الهواوي يحفظه قبل السياسي يفهمه

واكتب عن الحب وتهيم قلوب ما كانت هيام= واكتب عن العدل وتصير قلوب قاعة محكمه

وان لاح براق الغزل والعشق في صدر الغمام= ما شفت قبلي من نبت عشب القوافي في فمه

حركت وجدان البشر واشعلت عاطفة الرخام= واضحكت مجموعة ورق وابكيت حبر ومرسمه

كله عشان المترف اللي صار لي عشرين عام= أبطيت اعيشه عام يحلمني وعامين احلمه

اصحّي اسمه في شفاهي كل ما حاول ينام= واسمي منوم من يجي عشرين عام بمبسمه

يا مفتي افت العاشق اللي حج للبيت الحرام= محرم ويبغى الاجر والحجاج مثله محرمه

ما معه من دنيا الغرور الا وزاره والحرام= والدعوه ان الله نهار العرض الاكبر يرحمه

كم سجدة ٍ لله سجدها بين زمزم والمقام= كم مرة ٍ فيها قرا المصحف بليلة وختمه

أدّى فروض الحج واركانه على وجه التمام= ثم استعى واطّاف با لبيت العتيق وعظّمه

قال الخروج منين ؟ قال الحظ مع باب السلام= الحظ وداه لهذاك الباب واقتاد قدمه

لو هو مخير كان دور باب ثاني والسلام= مير البنادم ما يخبيه القدر ما يعلمه

ما يدري انه عقب ما يخرج من افواج الزحام= رايح يشوف المترف بعينه وباسمه يزهمه

واقف ولا عاذل ولا حارس عليه إلا اللثام= والساعه اللي تحمد الله يوم لبست معصمه

ماهوب هو لا والله الا هو ولا فيها كلام= اي والله انه هو ولا غيره بلحمه وشحمه!!

يعني بعد قلبي ترك درب المحبه واستقام!!= صارت لعانه حظي العاثر خذلني وخدمه!!

وقفت لحظه جرجرت لي سالفة عشرين عام= من سيرة اللي عام يحلمني وعامين احلمه

ما بين عشقي للمباح ونشوة اغراء الحرام= احترت انا اقفي عنه؟ والا اروح اضمه والثمه؟

يا مفتي افت العاشق اللي تاب لله واستقام= لو في خياله مارس أكبر ذنب؟ ربك يرحمه؟!!
[/poem]